Аны президиумунда Россия Федерацияны Шимал Кавказны ишлерини юслеринден министри Кузнецов Лев, Къарачай-Черкесияны Башчысы Темрезланы Рашид, Дагъыстанны Правительствосуну Председателини орнунда ишлеген Гамидов Абдусамад, Къабарты-Малкъарны Правительствосуну Председатели Мусуков Алий, Терк Башы Тегейни Правительствосуну Председатели Тускаев Таймураз, Чеченни Правительствосуну Председатели Эдельгериев Руслан, Ингушну Правительствосуну Председатели Гагиев Руслан, Ставрополь крайны Правительствосуну Председателини биринчи заместители Ковалев Иван, аны кибик тюрлю-тюрлю министерствола бла ведомстволаны келечилери болдула.
Джыйылыуда эм алгъа, «Шимал Кавказ федерал округну 2025-чи джылгъа дери ёсдюрюуню» кърал программасын толтурууну биринчи джылыны эсеблерин чыгъарыб, аланы сюздюле. Аны бла да къалмай, анда инвестпроектлени толтурургъа, округну субъектлеринде инвестицион болумну игилендирирге болушууну федерал эмда регионал мадарларына къаралды.
Кузнецов Лев, джыйылыуда инвестицион ишни джангы излемлеринде тохтаб сёлеше: «Алгъын биз округну ёсдюрюуню юсюнден сёлешген заманыбызда инвестицияны аслам кесеги бюджетден берилген ачхагъа этиллигин айта эдик. Энди инвестиция табыуну ол модели эскиргенди. Бюгюн Шимал Кавказны ёсюмню джолуна салыуну юсюнден сёлешген заманда биз керти экономиканы айнытыуну эмда экономика бла социал санагъатлагъа бюджетге кирмеген инвестицияланы тартыу бла хайырланыуну юслеринден сёлеширге керекбиз. Тыйыншлысы да алайды», - деди.
Округну субъектлеринде экономикагъа инвестицияла табыуну джолларыны юслеринден оюмларын да айтды.
Андан сора сёз Къарачай-Черкесияны Башчысы Темрезланы Рашидге берилди. Ол Бизнес-конференциягъа келгенлени джылы алгъышлаб, бу кърал магъаналы ишлерин бардырыуда алагъа джетишимле теджеди.
«Къарачай-Черкесиягъа инвестицияланы келиулери, ма бери, «Архыз» курортха, адамланы келиулери къалай эселе, ма алайдыла. Беш джылны мындан алгъа уа былайда джукъ да джокъ эди.
Бюгюн а «Архыз» курорт алгъа уруб баргъан курортду. Айхай да, быллай курортну кърал-энчи нёгерлик къуралмай, Шимал Кавказны ишлерини юслеринден министерстводан, кърал компанияладан, корпорацияладан, энчи бизнесден болушлукъ болмай ишлер мадар джокъ эди. Аны андан ары ёсдюрюрге инвестицияла берирге хазырла бла алланнганланы саны ёсгенден ёсе барды. Аланы кёбден кёб бола барлыкъларына биз не аз да ишек этмейбиз. Мен акъыл этгенден, «Архыз» гитче эмда орта бизнесни кесини ызындан элте, аланы ёсюмню джолуна сала баргъан мультипликаторду», - деди КъЧР-ни Башчысы Темрезланы Рашид, республикада инвестицион ишни къалай салыннганыны юсюнден хапар айта.
Ол билдиргенден, Россия Федерацияны Шимал Кавказны ишлерини юслеринден министерствосуну, Шимал Кавказны ёсдюрюуню корпорациясыны, КъЧР-ни Правительствосуну болушлукълары бла джашауда тола баргъан проектлени ичинде баш орунну дженгил ёсген терек бачхала салыуну проекти алады. Бу проект, деди Темрезланы Рашид, республикада кёгет бачха терекчилик санагъатны бютеулей ёсерине да, аны энчи бачхалада ёсерине да тамал къурайды. Ол айтхандан, хар проект неден да алгъа ол борчну толтурургъа керекди.
КъЧР-ни Башчысы Темрезланы Рашид РФ-ны Шимал Кавказны ишлерини юслеринден министри Кузнецов Левден тутхучлу инвесторлагъа берилген кредит ачханы «багъасын тюшюрюрге» болушурун да тиледи. Аны ол тилегин Бизнес-конференциягъа къошулгъанланы бары да джакъладыла.
Джыйылыуда Дагъыстанны Правительствосуну Председателини орнунда ишлеген Гамидов Абдусамад, аны кибик башхала да сёлешдиле. Ала билимлерин, сынамларын инвестицион ишлерин джангыча къураугъа, бизнесден не къадар уллу хайыр тюшюрюр джолланы излеуге, субъектле арасы байламлылыкъланы кючейтиуге салыр ючюн кюрешириклерин билдирдиле.
11-чи бизнес-конференциягъа къошулгъанла аны ахырында толтура тургъан эмда толтурургъа хазырлагъан проектлерини презентацияларын этдиле.
