Лепшокъланы Артурну къызы Алия атын сый бла айтдыргъан онглу джаш къызларыбызны бириди. Ол школда да иги окъуй, спорт бла кюреше, бу джаны бла ашхы джетишимлеге ие болгъанды.

Тири къымылдагъан фахмулу, джигер къыз киокусинкай каратэден Къарачай-Черкес, Къабарты-Малкъар республикаланы, спортну кумитэ тюрлюсюнден Невинномысск шахарны чемпионуду.
Алия 2010-чу джыл аууз-герги (октябрь) айны 30-да Джёгетей Аягъы шахарда туууб, Артурну халкъны ашхы адетлерин багъалатхан, урунууну сюйген юйдегисинде ёседи. Тёбен Архыз посёлокга джюрюб, орта билим берген школда джетишимли окъуйду. Тогъузунчу классха барады. Школланы арасында бардырылгъан, башха дараджада къуралгъан тюрлю-тюрлю конкурслагъа, турнирлеге къошулуб, алчы орунланы алыб, атын махтау бла айтдыргъанлай турады. Спорт бла кючлю кюрешиб башлагъанлы 3 джыл болады. Арадан кёб заман озмаса да, къызчыкъ киокусинкай каратэден ашхы джетишимлеге ие болгъанды.
Алия мындан алда Къарачай-Черкес Республикада Уллу Хорламны кюнюне аталыб, 14-15 джыл толгъан къызланы арасында, 50 килограмм ауурлукъда киокусинкай каратэден бардырылгъан республикан эришиулеге эки кере къошулуб, биринчи орунланы иелеб, медалла, Хурмет грамота бла диплом алгъанды.
Ары дери 2024-чю джыл Къабарты-Малкъар Республикада киокусинкай каратэден бардырылгъан эришиулеге къошулуб, 14-15 джылгъыланы арасында, 45 килограмм ауурлукъда барын да хорлаб, Алия чемпион болгъанды. Быйыл спортну кумитэ тюрлюсюнден Невинномысск шахарны биринчилигине аталыб бардырылгъан эришиуледе да кесини джылында ауурлукъдан барын да хорлаб, биринчи болгъанды. Ол «ОЯМАС» спорт клубну биринчилигинде да хорлагъанды.

Алчакъланы Хусей.