Анда ведомствону къуллукъчулары бла ветеранларына кёб джылы сёз айтылгъанды. Ол кюн аланы байрамлары бла Къарачай-Черкесияны Башчысы Темрезланы Рашид да алгъышлагъанды.
«Бюгюн биз Россия Федерацияны миллет излемлерин къоруулаучуланы, аны къраллыгъын, территориясыны бирлигин, конституцион къуралышын эмда бизни адамларыбызны къоркъуусузлукъларын сакълаучуланы байрамларын этебиз.
Сиз кесигизни джашауугъузну къыйын, алай а Ата джуртну сакълауну сыйлы борчун толтуруугъа багъышлагъансыз. Кесигизни ишигиз бла сиз Россия Федерацияда эмда аны бёлюнмезлик кесеги Къарачай-Черкесияда рахатлыкъ орналыб турлугъуна, аны социал-экономика дараджасы тутхучлу ёсюб барлыгъына уллу юлюш къошасыз.
Къаджыкъмау, профессионализм, джууаблылыкъ эмда борчха джууаблы кёзден къарау Россияны ФСБ-ны Къарачай-Черкес Республикада управлениесини къуллукъчулары бла ветеранларыны баш шартлары болуб келгендиле, болуб да турлукъдула.
Бюгюн терроризм бла экстремизмге, коррупциягъа къаршчы кюрешиуде, джашау магъаналы объектлени, артыкъ да бек бизни адамларыбызны тынчлыкъларын сакълауда Къоркъуусузлукъну федерал къуллугъуну Къарачай-Черкесияда управлениесини къуллукъчуларыны алларында къыйын эмда джууаблы борчла турадыла. Этер ишигизни иги билгенигизни, джигитлигигизни, Къарачай-Черкесияны кърал властыны органлары бла, аны кибик джорукъ сакълаучу эмда надзор къуралышла бла къысха байламлылыкъда ишлегенигизни кючюнден сиз ол борчланы махтаулу толтуруб келесиз.
Къарачай-Черкес Республиканы Зеленчук муниципал районунда законсуз къуралгъан сауутлу къуралышны табыу бла, къурутуу джаны бла кёб болмай бардыргъан ишигиз аны алайлыгъына толу шагъатлыкъ этеди. Ол операцияны кёзюуюнде 5 сауутлу боевик, заманында табылыб, къурутулгъандыла.
Аны бла бирге ол къралыбызны эм рахат регионларыны бири Къарачай-Черкесияны адамларыны рахатлыкъ бла тынчлыкъны сакълаугъа кеслерини юлюшлерин къошаргъа хазырлыкъларыны, аны кибик биз бардыргъан ишни этимлилигини кючюнден болгъанды», - дегенди ол анда.
Къарачай-Черкесияда закон бла джорукъну бегитиуде, рахатлыкъ бла тынчлыкъны сакълауда энчи джетишимлери ючюн Темрезланы Рашид ол кюн Управлениени тамадасы Кобыляченко Игорну, ведомствону къуллукъчулары Хапаланы Руслан бла Ядров Сергейни «Къарачай-Черкес Республикагъа 25 джыл» деген юбилей белгиле бла саугъалагъанды. Аны бла да къалмай, КъЧР-ни Башчысы Управлениени бир къауум къуллукъчусуна «Къарачай-Черкес Республиканы махтаулу юристи» деген сыйлы атла атагъанды эмда Бюсюреу письмола бергенди.
Кобыляченко Игорь къууанч джыйылыуда Управлениени коллективине Россияны ФСБ-ны башчылыгъындан келген алгъышлауну окъугъанды. Анда регионда рахатлыкъ бла тынчлыкъны сакълауда ведомствону къуллукъчулары иги джетишимле этгенлери да чертилгендиле. Управлениени къуллукъчулары джыйылыуну кёзюуюнде къуллукъ борчларын толтура ёлген тенглерин бир такъыйкъаны шош болуб туруу халда эслерине тюшюргендиле.
Джуртну къоркъуусузлугъун сакълауда энчи джетишимлери ючюн Кобыляченко Игорь ведомствону талай къуллукъчусун Управлениени саугъалары бла саугъалагъанды.
Ол кюн ФСБ-ны Къарачай-Черкесияда управлениесини къуллукъчуларын байрамлары бла КъЧР-ни Парламентини Председатели Иванов Александр, КъЧР-ни Правительствосуну Председатели Озов Аслан, РФ-ны Президентини Шимал Кавказ федерал округда Толу эркинликли келечисини аппаратыны федерал инспектору Дральщиков Игорь, КъЧР-ни Баш сюдюсю Семенланы Руслан дагъыда башхала да алгъышлагъандыла.
