Черкесскеде 17-чи номерли гимназия республиканы ара шахарыны эм уллу школуду. Анга тамамлы ремонт этилгенди, энди ол 2200 сохтагъа эшиклерин ачаргъа хазыр болгъанды. Былайда сабийле биринчи сменада окъурукъдула.

Тамамлана тургъан ремонт ишледен хапарлы болур иннетде РФ-ны КъЧР-ден сенатору Кърым Казаноков, РФ-ны Кърал Думасыны депутаты Ёзденланы Солтан, КъЧР-ни вице-премьери Орусланы Марат, КъЧР-ни къурулуш эмда фатар-коммунал мюлкюню министри Ёзденланы Рашид, КъЧР-ни Парламентини депутатлары Джаммаланы Руслан бла Фатима Карданова, Тамамлы къурулушну дирекциясыны келечилери гимназиягъа баргъандыла.
Школда инженер сетле ауушдурулгъандыла, ичи толусу бла джарашдырылгъанды. Спорт зал джангыртылгъанды, хант юй ашхы техника бла баджарылгъанды. Гимназияны эшиклери, поллары ауушдурулгъандыла. Кёб турмай «Бирикген Эресей» партияны къайгъырыуу бла джангы мебель да салынныкъды. Школну 600 сабий окъугъан бир мекямы тамамлы ремонтдан сора хайырланыугъа теджелгенди.
Бу къауум Кавказский посёлокну школуна да къонакъ болгъанды – былайда тамамлы ремонтдан сора хар зат да заманны излемине толу джууаб этеди. Къонакъла, устазла эмда сохтала бла да ушакъ этиб, ол затха толу мюкюл болгъандыла. Аны бла да къалмай, ала Чапаевское элде Хачирланы Исмаил атлы школгъа да баргъандыла. Анда ремонт планда белгиленнгенича баргъанын да кёргендиле.