Къарачай-Черкесия, Эресейни джыйырма субъектини бири болуб, къаты-къуту багушну джарашдырыуну сан форматда территориал схемасы бла ишлеуню джолуна тургъанды.

Документ къаты-къуту багушну (ТКО) кърал информацион системасында эсебге алыннганды. Ол зат регионну джашауунда магъаналы ишди.
Эресейни экология операторуну пресс-къуллугъу билдиргенине кёре, бу система бла ишлеу логистиканы игилендирирге эмда багушну дженгилирек джетер джерине элтирге амал береди. Аны юсюне да багушну къуюучу эмда джарашдырыучу джерлени кереклисине кёре кёбейтирге да себеблик этеди. Алайды да, Къарачай-Черкесия Санкт-Петербург, Москва эмда Тёбен Новгород областла, Алтай Республика эмда башха регионла бла тенгликде бу этапдан ётгенди, дерге боллукъду.
– Территориал схема стратегия документди. Ол къаты-къуту багушну регионда джюрюшюнден толу хапар береди – бёчкеле тургъан джерден башлаб, джыйылгъан джерине, андан да джарашдырылгъан эмда тохтагъан джерине дери. Аны сан форматха кёчюрюу джумуш баджарыуну джангы дараджагъа чыгъарыуду, – деб чертгендиле Эресейни экология операторуну пресс-къуллугъунда.
Оператор билдиргеннге кёре, къралны 37 субъектинде бу тукъум схеманы проектлерин хазырлагъандыла, алагъа устала къараб, багъа берликдиле.