Быйыл байрым (февраль) айны 10-да Черкесскеде «Бирикген Эресей» партияны регионал бёлюмюню толтуруучу комитетини тамадасы Джаммаланы Руслан бла республиканы профсоюзларыны тамадасы Айбазланы Раиса кесаматха къол салдыла.
Анда ала ишчилени излемлерин, социал-урунуу эркинликлерин биригиб джакъларгъа, тюрлю-тюрлю халкъ программаланы бирге джашаугъа киргизирге деб, келишгендиле. Алайгъа келгенлени арасында республиканы профсоюз организацияларыны тамадалары, «Бирикген Эресей» партияны къурамында болгъан, аны бла байламлы ишле бардыргъан къуллукъчула бар эдиле.
Айбазланы Раиса чертгенден, аллай биригиб къуралгъан ишле эртдеден да бардырылыб турадыла.
«Быллай джумушла, бусагъатда цифралы экономиканы, социал тенгликни ёсюмюню заманында, ишчилени эркинликлерин джакъларгъа мадар бередиле. Ол профсоюзланы сыйларын, дараджаларын кёлтюрген инструментди. Бизни баш ишлерибизни бири, керти ишчи механизмлени юслери бла экономиканы ёсюмюню программасын джашаугъа киргизиудю.
Бу терен магъанасы болгъан бек керекли иш уруннган джамагъатны излеми бла эркинлигин джакълагъан ашхы мадарды. Ол профсоюзла бла партияны кючюн бирикдиреди. Бу келишиу бла профсоюзланы, «Бирикген Эресей» партияны къурамларында болгъан адамла толу шагъырейдиле. Аны ючюн, бизни бу къагъытха къол салыргъа толу эркинлигибиз барды. Мында хар не да Къарачай-Черкесияны джеринде джашагъан, ишлеген адамланы, коллективлени урунуу эркинликлерин бегитиу бла байламлы джарашдырылгъанды.
Профсоюз кесини этерик, этген ишин партиягъа билдиргенлей тургъанды. Партия да, бизге эс бёле, белгиленнген программаланы, башха ишлени джашауда бардырыргъа болушады. Биз анга разыбыз», – деди Раиса.
Андан сора «Бирикген Эресей» партияны регионал бёлюмюню толтуруучу комитетини тамадасы Джаммаланы Руслан сёлешди. Ол да адамланы бирикдирген, арада шохлукъну кючюн бегитген талай затны юсюнден айтды.
«Бирикген Эресей» партиягъа бу этилген кесаматны терен магъанасы барды. Не ючюн десенг, халкъ пограммаланы джашаугъа киргизиу бизни къралны, аны ичинде Къарачай-Черкесияны, баш ишлерини бирине саналады. Профсоюзланы джамагъат бла, урунуу коллективле бла байламлылыкъ джюрютюуде ашхы сынамлары, билимлери бизге бек багъалыды. Адамланы этген оюмлары, сезимлери бла байламлы къуралгъан проектле республиканы джамагъатыны джашауун игилендирирге джарайдыла. Биз ала бла ишлерге борчлубуз.
Биз бусагъатда адамланы турмуш джашауларын игилендирген, аны дараджасын кёлтюрген джангы программаны юсю бла ишлейбиз. Профсоюзла анга тири къошулгъандыла. Биз ала бла бир-бирибизни толу ангылайбыз. Ала бек уллу иш бардырадыла, сау болсунла.
Биз республиканы джамагъатыны излемин толтурургъа джораланыб этилген башламчылыкъны джакъларыкъбыз, адамла бла, урунуу коллективле бла, профсоюзла бла къысха байламлылыкъ джюрютюрюкбюз», – деди ол.
Къол салыннган кесаматны тамалында «Бирикген Эресей» партия Къарачай-Черкесияны профсоюзларына джакълыкъ табдырлыкъды. Ала, халкъны джашауун, социал-экономика болумун иги эте, биригиб ишлер муратлыдыла.
Лепшокъланы Хусеин.
