Махар ёзен джуртубузну сейир мюйюшлерини бириди. Адам кёзюн алалмай къарагъан мийик тау джитиле, оюлгъан, джер-джерде къалау болгъан ариу ташла Махар сууну эки джаны бла онла бла километрлени барадыла.

Аны кенгнге белгили этген адамны саулугъун бакъгъан, аурууланы къурутургъа себеб болгъан нарзанлары, адамгъа тирилик бериб, аны къанатландыргъан таза суулары кёбдюле, Ёзенни джасаб, ариулугъуна ариулукъ къошхан Махар суу, таууш этиб, толкъунлары бир-бирин сюре, къызыу барады. Уллу, ууакъ чучхурлары, тёгерекден саркъыб анга къошулгъан дарман суулары кёбдюле. Махар суугъа, ала да мийикледе ёмюрлени тургъан къарладан, чыранладан саркъыб къошуладыла.
Мында промышленность объектле болмагъанлары ючюн, адамла табигъатны сакълагъанларыны себебинден, хар затны асламысы джаратылгъаныча турады. Чегетледе нарат, нызы, башха тюрлю терекле адамны саулугъун бакъгъан таза хауа къурайдыла. Кёгетлери болгъан терекле, джаныуарла, тюрлю-тюрлю къанатлыла, джугъутурла, къашха эчкиле дагъыда башха кийик джаныуарла кёбдюле.
Былайыны эки уллу чучхуру барды. Аланы бири джууукъда, экинчиси узакъдады. Атлары болмагъанлары ючюн, адамла биринчи, экинчи чучхур деб къоядыла. Ала экиси да 40 метр мийикликден къуюладыла. Къатларына баргъан къыйын тюлдю, алагъа джетгенле, саулукъ бегитген чокъуракъ суулада джуууннган да этедиле. Баралмагъанла берлакъдан къараб, таза хауаны тогъуб, керпесленедиле. Аладан сора Махар сууну мийик чучхуру да сейирди. Ол, уллу къаяладан ууакъ шоркъала болуб къуюла, табигъатха сейир ариулукъ береди. Джай иссиледе аны сууу кёб болады, къыш сууукълада таркъаяды. Бери чыкъгъан тынчды. Чучхурлагъа баргъан хар адам, арыгъанын да унутуб, ёргеден ёрге чыгъаргъа излейди. Мийиклик кесине тартыб, анга учунмакълыкъ, тирилик келеди, ол табигъатха, кёкде учуб баргъан акъ булутлагъа сюйюнюб къарайды, кюнню алтын таякъларыны джылыуунда ийнакъланады. Уллу Аллах бу ашхылыкъны адамлагъа саугъагъа джаратханды.

Лепшокъланы Хусеин.