Джуртубузну байлыгъы дуниягъа берекет чачхан аламат хазнады. Ол сейирлик, джомакъ уягъа ушай, адамны джюрек тёрюн къууанчха ачады. Аллахдан саугъа болуб, бизге ата-бабабыздан джетген ол байлыкъ адамны кёб тюрлю ауруудан багъады. Алибек суу да аллай хазнады.

Бу баргъан суу шоркъулдай, джырлай баш энгишге къуюла, Аманаууз суугъа къошулады. Доммай таладан узакъ болмай табигъатны ариу джеринде орналгъан кём-кёк чокъуракъ суу, Алибек эмда башха бузладан башланады. Алибек буз Теберди миллет паркда эм уллугъа саналады. Аны узунлугъу 10 километрди, кенглиги 50 метрге дериди. Ол асыры тазадан тюбюнде кёб тюрлю багъалы, сыйлы таш болгъаны кёрюнюб турады. Суу кёб болуб, къызыу барса да, аны тазалыгъы тюрленмейди. Бу суу баргъан ёзенде тюрлю-тюрлю гоккалары болгъан тау хансла, ууакъ кёкенле ёседиле. Джай аланы ариу ийислери бир-бирине къошулуб, хауа, адам тоймай тогъуб солурча, татлы болады. Аны башында буз къаяла кёрюнедиле, аладан ёргеде Алибек тау, тенгизден 3592 метр мийикликге чыгъыб, тёгерекге къууат салады. Алибек суу баргъан ёзен, аны тёгереги бютеу Шимал Кавказда эм ариу джерге саналады. Ол ёзен бла энгишге баргъан адам кийик ёсюб, ёмюрлени тийилмей тургъан нарат, нызы чегетлени кёрлюкдю. Ала, кёб джылланы къалын болуб, ёсюб тургъанлары ючюн, бутакълары джайылыб, бир-бирине джетиб, башлары кёкге мийик чыгъыб, салкъынлыкъ къурайдыла. Не исси кюнде да тюблерине кюн таякъла ётелмеген джерлери барды.
Туристле, къонакъла, джергили джашагъанла да Алибек сууну ёзенин бек сюедиле. Ары баргъан къыйын тюлдю. Джартысына дери улоу чыгъады, андан ары джаяулай атланыргъа болады.
Бери келген хар адам табигъатны джашил таурухуна бёлениб, аны джюреги джырлайды, кёлю токъ болады. Ол дженгиллениб, саулугъун бегитиб, учар къушча, къанатланады.

Лепшокъланы Хусеин.