Лепшокъланы Наныуну джашы Магомет, фахмусун, билимин, кючюн аямайын, хар тутхан ишине тири джюрюш бериб, атын сый бла, махтау бла кенгнге айтдыргъан онглу джашларыбызны бири эди. Аны фахмусу, билими, чомарт джюреги халкъгъа, Джуртха халал къуллукъ эте, ол, тёгерекге ашхылыкъ джая, джашагъанды.

Магомет 1926-чы джыл Даусузда Наныуну огъурлу юйдегисинде туугъанды. Ол, 7-джыллыкъ школну бошагъандан сора, колхозда ишлеб башлагъанды. Туугъан тауланы джомакълы къойнунда, тюрлю-тюрлю ишлени толтура, джигер уруннганды. 1943-чю джылны абыстол (ноябрь) айыны 2-де къарачай халкъны киши джерге, Къазахстан бла Орта Азиягъа, кёчюредиле. Наныуну юйдегиси Къазахстаннга тюшеди. Ата ауушады да, аналары 7 сабий бла къалыб, Магомет тамада болуб, алагъа къараргъа керек болады. Ол кёчгюнчюлюкню аллы бла элчи къыз Чотчаланы Халиматха юйленнген эди. Юй бийчеси бла бирге, кече-кюн демей, къум тюзде урунады. Ачлыкъ, джаланнгачлыкъ къысыб, хауа джарашмай кёб адам ёледи. Магометни гитче къызчыгъы да ауушады. Юй бийчесини атасы бла анасы да кетедиле керти дуниягъа. Ол аны къарнашы бла эгечин да кесини юйдегисине къошады. Магомет, анасына болуша, сабийлени барына да къарайды. Къыйын болумда эс ташламай, кесин къатдырыб, джигерликни, джигитликни джолунда кече-кюн, къыш-джай къолундан келгенни этиб кюрешеди. Ишлегенден тышында да окъургъа, башхалагъа болушургъа да джетишеди. Кърал, мюлкде кёргюзген мийик джетишимлери ючюн, аны 1945-чи джыл никкол (июнь) айны 6-да «За доблестный и самоотверженный труд в период Великой Отечественной войны 1941-1945 гг.» деген медаль бла саугъалайды.
1957-чи джыл, тюзлюк орун алыб, Джуртларына къайтыргъа эркинлик берилгенинде, Лепшокъланы юйдегилери халкъ бла бирге Кавказгъа къайтады. Ала туугъан Даусуз эллерине тюшюб, былайда юй ишлеб, джашау къураб башлайдыла. Магометни юч джашы бла юч къызы болады. Аны, 30 джыл болгъан джаш устаны, Ленин атлы колхозну, Даусуз, Огъары, Тёбен Ермоловка, Хуса Къарданик, Архыз посёлок кирген 7-чи бёлюмюню тамадасы этедиле. Лепшокъ улу, ол уллу мюлкге тамадалыкъ этиб, аллай бир элни кереклисине къараб, джукъну джарсытмай, хар затны кёз туурада тутуб, 1957-чи джылдан пенсиягъа чыкъгъынчыннга дери ишлейди.
Аны Зеленчук районну ревизион комиссиясыны тамадасы да этедиле. Магомет ол къуллугъун да сый бла толтурады. Ол кёзюуледе элчиле биригиб, байрамла этгендиле, уруннгандыла. Бир-бирине болушуб, алагъа салыннган борчну сый бла толтуруб кюрешгендиле. Миллет айырмай бир юйдегича джашагъандыла.
Магометни таб башчылыкъ этиую бла ол элледе да хар зат тюзелиб, адамланы турмуш джашаулары иги болуб, мюлкню джетишимлери ёсюб, аты кенгнге айтылады. Джашау джолунда кёргюзген мийик джетишимлерине багъа бере, кърал Магометни 1971-чи джыл арттотур (апрель) айны 8-де «Знак Почёта» деген орден бла, 1981-чи джыл алтотур (март) айны 13-де «За особые заслуги в области социалистического строительства и обороны СССР», «Трудового Красного Знамени» деген орденле бла, 1981-чи джыл байрым (февраль) айны 7-де «За долголетний добросовестный труд» деген, 1986-чы джыл элия (июль) айны 18-де «Ветеран труда» деген медалла бла саугъалагъанды.
Анга, колхозну ишине къошхан энчи юлюшю ючюн, «Заслуженный колхозник ордена Трудового Красного знамени колхоза им. Ленина Зеленчукского района» деген ат аталгъанды.
Магомет 2004-чю джыл элия (июль) айны 30-да ауушханды. Аллахны рахматында болсун.
Ол 50 джылдан аслам джашауун Джуртну, джамагъатны социал-экономика болумун иги этерге атаб ашыргъанды. Аны башчылыгъы бла кёб мюлкле аякъ юсюне тургъандыла, бир мюлк къуралгъанды.
Лепшокъ улу джарыкъ, уллу адамлыкъны, ишленмекликни джюрютген, башхалагъа терен къайгъыргъан, кючлю башчы болгъанды.
Аны 6 сабийи, 20 туудугъу барды, аладан тугъанла да кёбдюле. Ала республиканы тюрлю-тюрлю санагъатларында атларын сый бла айтдырыб ишлейдиле.
Халкъ кесини сыйлы, махтаулу адамларын унутурукъ тюлдю. Адамла аны разы болуб эсгередиле.

Узеирланы Хусей.