Алтотур айны 11-де Къарачай-Черкесияны тарих-маданият эмда табигъат музейинде-заповеднигинде аны биринчи директору Байчораланы Османны къызы Мариямны эсгериуге аталгъан кёрмюч ачылгъанды.

Музейни къуллукъчулары бу кёрмюч республиканы тарихин сакълаугъа, маданиятын ёсдюрюуге уллу къыйын салгъан фахмулу тамаданы джашау джолундан толу хапарлы болур мадар бергенин чертедиле. Ала айтхандан, кёрмючде Байчораланы Мариямны джарыкъ джашаууна шагъатлыкъ этген суратларын, документлерин, энчи затларын, саугъаларын кёрюрге боллукъду.
Байчораланы Мариям 1937-чи джыл алтотур (март) айны 11-де туугъанды. Медицина училищени айырмагъа тауусса да, кёзю музей ишге къараб, аны бла кюрешиб башлагъанды. 1970-чи джыл ол Къарачай-Черкесияны кърал музейине башчылыкъ этиб тебрегенди.
Мариямны башчылыгъы бла музей экспонатланы джангыртыу башланнганды. Илму экспедицияла эмда тинтиу ишле тири бардырылгъанлары бла музейни хазнасы 7 кереге кёб болгъанды. Кёб турмай музейге биринчи дараджалы маданият объект деб айтылгъанды.
Кёб заманны салыннган борчну джетишимли толтургъаны ючюн, Байчораланы Мариямны «Урунууда джигерлиги ючюн», «Урунууну ветераны» медалла эмда «Хурмет Белгиси» орден бла саугъалагъандыла. 1995-чи джыл анга «Эресей Федерацияны маданиятыны махтаулу къуллукъчусу» деген сыйлы ат да берилгенди.
Фахмулу, болумлу тиширыугъа аталгъан кёрмючге ким да КъЧР-ни тарих-маданият эмда табигъат музейини-заповеднигини залларын-
да алтотур (март) айны 27-не дери хакъсыз къараргъа боллукъду.

СОЛТАНЛАНЫ З.