Москваны Замоскворечье районунда Г.В. Плеханов атлы Эресейчи экономика университетни студенти Темирболатланы Руслан 18-20 джыл болгъан джашла бла къызланы арасында самбодан Эресейни биринчилиги ючюн бардырылгъан эришиуледе алтын медаль алыб къайтханды.

Эришиуле байрым (февраль) айны 19-дан 23-не дери Къазан шахарда ётгендиле. Анга Эресейни регионларындан кёб спортчу къошулгъанды. Анда хорлагъан спортчула миллет джыйым командагъа къошулур мадар табхандыла.
Алайды да, бизни джердешибиз, Г.В. Плеханов атлы Эресейчи экономика университетни спорт клубуну келечиси Темирболатланы Руслан 79 килограммгъа дери ауурлукъда биринчи орунну алгъанды.
Ол эришиуледе кюмюш медаль алгъанлагъа Европаны биринчилигине, алтын медалны алгъанлагъа уа Дунияны биринчилигине къошулургъа мадар берилгенди.
Къазанда бардырылгъан эришиуледе 47 – 80 килограмм ауурлукълары болгъан спортчу джашла бла къызла самбода усталыкъларын кёргюзгендиле. Алагъа дунияны белгили спортчуларындан, халкъла арасы эришиуледе хорлагъанладан къуралгъан жюри багъа бергенди.
Темирболатланы Руслан эришиулеге кеси окъугъан университетни атындан къошулгъанды. Ол хорламгъа ие болгъан бла къалмай, «Эресейни спортуну устасы» деген атны алыргъа керекли мардаланы толтургъанды. Алай бла, Руслан къралны джыйым командасына киргенди. Энди ол Грецияда Дунияны биринчилиги ючюн бардырыллыкъ эришиулеге къошуллукъду.
– Руслан Эресейни биринчилигине ВУЗ-ну залында хазырланнганды. Ол хар къуру да, самбода усталыгъын кёргюзюб, атын махтау бла айтдыргъанлай турады. Ол къайсы бир эришиуге къошулса да, таукеллигин, усталыгъын танытханлай турады. Командабызны къурамында кёб спортчу барды, ала бары да бир-ирлерине джан аурутадыла, хорламгъа учундурадыла. Руслан эки раундда тёрт кере джыгъышыб, биринчи оруннга чыкъгъанды. Биз анга бек къууаннганбыз. Спортчуну кереклисича юретиб, хорламгъа кёллендирирге тыйыншлыды. Алай бла, ол джетишимли болмай къаллыкъ тюлдю, – дейди Русланны тренери Аслан Бетмирзаев.

САЛПАГЪАРЛАНЫ Умар.