КъЧР-ни МВД-ны къуллукъчулары Иркутск областдан полициячыла бла байламлылыкъда Ростов областда джашагъан 18 джыл болгъан биреулен аманлыкъ ишлеге къатышханын ачыкълагъандыла.

Алгъаракълада хыйлачыла алдаб, ёлген аскерчини анасын, Черкесск шахарда джашагъан 66 джыл болгъан тиширыуну 2,1 мелиуан сомундан къуру къойгъандыла. Хыйлачыла ачханы алыргъа башында сагъынылгъан джашны ашыргъандыла.
Полицияны къуллукъчулары ачыкълагъаннга кёре, хыйлачыла тиширыу бла биринчи кере быйыл байрым (февраль) айны 20-да байламлылыкъгъа чыкъгъандыла. Аланы бири: «Мен РФ-ны Къоруулау министерствосуну къуллукъчусума. Аскер къаугъада ёлген джашыгъызгъа кърал саугъа берир ючюн энчи хапарыгъыз керекди», – дегенди. Тиширыу анга ол излеген информацияны айтханды. Аны ызы бла тиширыугъа «ФСБ-ны къуллукъчусу» къонгурау къакъгъанды. Ол: «Сизни энчи хапарыгъыз хыйлачылагъа тюшгенди. Ачхагъыз сакъланыр ючюн, счётугъуздан алыб, ачханы бизни къуллукъчубузгъа бериб иерге керексиз», – дегенди. Аладан адам келиб, тиширыудан 2,1 мелиуан сомну алыб кетгенди. Андан сора да хыйлачыла, аны бла байламлылыкъгъа чыгъыб, «къысха заманны ичинде ачхангы барысын да ызына къайтарлыкъбыз» дегенни айтыб, тиширыудан энтда 200 минг сом излегендиле. Бу да, ала айтханнга ийнаныб, ачханы ашыргъанды. Алай а, ачха къайтарылмагъанды, хыйлачыла да байламлылыкъгъа чыкъгъанны къойгъандыла. Алай бла, тиширыу, кесин алдатханын ангылаб, хапарын полициягъа билдиргенди.
КъЧР-ни МВД-ны къуллукъчулары, оператив-излеу ишле бардырыб, тиширыуну ачхасын алыб кетгенни ызындан тюшгендиле. Ол Иркутск областда дагъыда аллай аманлыкъ иш эте башлагъан кёзюуюнде тутулгъанды.
Джаш адам айтханнга кёре, бёлек заманны мындан алда ол интернетде иш теджелген билдириуню кёрюб, ачха тюшюрюрге излегенди. Иш теджегенле бла байламлылыкъгъа чыкъгъанды, ала да анга джумушла бериб башлагъандыла. Хыйлачыла джаш адамны Черкесск шахаргъа ашырыб, ёлген аскерчини анасыны ачхасын алдыргъандыла, ол да ачханы алагъа элтиб бергенди.
Эресейни МВД-ны Черкесск шахарда бёлюмю РФ-ны Терслеу кодексини 159-чу статьясыны 4-чю кесегине кёре терслеу иш ачханды.
Аманлыкъ ишге къошулгъан джаш адам тутулгъанды. Бу ишни ахырына дери ачыкълар ючюн, тинтиу ишле энтда бардырыладыла.

КъЧР-ни МВД-ны пресс-къуллугъу.