Мындан алда Айбазланы Рамазанны къызы Борлакъланы Марина ООН-ну Женевада бардырылгъан джыйылыуунда Эресейни Аргропромышленность комплексини эмда Тиширыуларыны союзуну атындан «Инклюзия через призму любви и технологий: от личного опыта к устоичивому развитию» деген темагъа сёлешгенди.

Марина бютеу Эресейге белгили табышлылыкъ бла тири кюрешгенлени бириди, джамагъат къуллукъчуду. Ол «Кубань» деген эл мюлк артелге башчылыкъ этеди. Эресейни Тиширыуларыны союзуну Къарачай-Черкесияда бёлюмюню тамадасыды. Аны таб башчылыкъ этиую бла «Кубань» не джаны бла да, кенгнге белгили, юлгюлю эл мюлк болгъанды.
Борлакъланы Маринаны ол магъаналы халкъла арасы уллу джыйылыуда сёлешгенин газет окъуучулагъа теджейбиз.
«Багъалы тиширыула эмда джюйюсханла, миллетлени хурметли келечилери, тенгле! Меннге мында, Женевада, Эресейни агропромышленность секторуну эмда Тиширыуларыны союзуну хакъындан сёлешген уллу сыйды.
Мен башчылыкъ этген «Кубань» деген эл мюлк артель, адамланы инджиулерине къайгъыра, кёб тюрлю иш бардырады. Саулукълары къолайсыз болгъан сабийле тургъан интернатха къарагъанлай турабыз. Эресейни Тиширыуларыны союзуну Къарачай-Черкесияда регионал бёлюмюню тамадасы болуб, мен кесими бардыргъан ишими тамалын кюн сайын саулукъларында кетмез инджиулери болгъан сабийлеге къараб тургъан, аланы хар бирине энчи къайгъыргъан джигит тиширыуланы саугъалауда, алагъа разы болгъаныбызны билдириб турууда кёреме.
«Мир моими глазами» деген халкъла арасы проект уллу кючю болгъан сейир зат, къралланы арасында шохлукъну къурч кёпюрлерин бегитген ашхы кючдю. Ол бизге керти фахмулу адамланы кёрюрге, ала бла танышыргъа, сынам алмашдырыргъа мадар береди. Аны джашаугъа киргизе, биз технология болушлукъ этгенден сора да, адамны сыйын сакъларгъа, кёлтюрюрге джараулу ишле къурайбыз. Сакъатланы, саулукълары къолайсызланы сыйлары болгъанлай турургъа керекди. Алай этиу адамлыкъны, ишленмекликни шартын кёргюзеди.
ООН-ну бу площадкасында системалы оноула этиуню юсюнден да айтыргъа тыйыншлыды. Биз кесибизни «Кубань» атлы эл мюлк предприятиебизни ишинден юлгю келтириб айтсакъ, аграр сектор инклюзив халда болаллыгъын билдиребиз. Бизнесни социал джууаблылыгъы – ол джамагъатны фундаментиди. Биз,
инклюзивли иш орунла къурарыкъ орта, гитче бизнесни джакъларгъа халкъла арасы мадарла къураргъа чакъырабыз.
Медицина бла цифралы суверенитетни юсюнден айтсам, технологияны ауазын тас этген адамгъа, ол ойнаб-къайнаб джашагъан тюлдю, ауазын билдирирге мадар берген эркинликди. Биз, цифралы медицинаны хар адам да хайырланырча, реабилитацияны системасы тынч болурча этиуню джакълайбыз. Бу ишни юсюнде саулукълары къолайсыз болгъанланы цифралы къоркъуусузлукълары сакъланыргъа тыйыншлыды. Дунияны бусагъат заманында алагъа заран джетиб къалыргъа боллукъду. Биз аланы эркинликлерин сакълагъан халкъла арасы протоколла къураргъа керекбиз.
Юйдеги инклюзияны субъекти болгъанын чертиб айтсакъ, инклюзияны политикасын къуру адамгъа буруб къоймай, аны юйдегисин джакъларча да этерге тыйыншлыды. Нек десек, кючлю юйдегиден кючлю кърал, бирча тургъан мамырлыкъ, рахатлыкъ къуралады.
Сёзюмю аягъында айтыргъа излегеним: келигиз инклюзияны керти адам сынамны тамалында къурайыкъ. Биз, сабийлерибизни кёзлери бла кёрген дуния – ол технологияла джакълагъан, экономика мадар берген, адамны эркинлиги сакъланнган дунияды», – дегенди Борлакъланы Марина.
Борлакъланы Марина ол оюмну республикабызны журналистлери бла бардырылгъан пресс-конференцияда да айтханды.

Лепшокъланы Хусеин.