Мындан алда республикан прокуратураны мекямыны залында «тёгерек стол» бардырылды. Ол коррупциягъа къаршчы кюрешни эсеблерин чыгъарыугъа аталгъан эди.
Алайгъа келгенлени арасында Халкъ фронтну регионал бёлюмюню, Къарачай-Черкес Республиканы Джамагъат палатасыны, КъЧР-ни Башчысыны Коррупциягъа къаршчы ишлеге къарагъан управлениесини, республиканы кёбчюлюк информация мадарларыны къуллукъчулары бар эдиле.
Республиканы прокуроруну коррупциягъа къаршчы закон къалай толтурулгъанына къарагъан болушчусу Боташланы Радмир бу джаны бла этилген ишлени юслеринден юлгюле келтире, терен хапар айтды.
«2006-чы джылны биринчи кварталында прокурорла коррупциягъа къаршчы закон 950 кере бузулгъанын ачыкълагъандыла. Аланы тюзетир муратда 400 прокурор акт джазылгъанды. Къуллукълада ишлеген 100-ден аслам адам дисциплинар эмда административ джууаблылыкъгъа тартылгъанды. Республиканы сюдлерине 12 иск берилгенди. Прокурорланы излемлери бла коррупциягъа тартхан 67 норматив акт законну излемине кёре джарашдырылгъанды.
Закон бузулуб, коррупция бла байламлы ишле, кърал муниципал къуллукъда, бюджет бла байламлы кърал, муниципал энчиликде болгъан затланы хайырландыргъан сагъатда, кърал эмда муниципал болушлукъ этген кёзюуде да болгъандыла. Аллай кемликле республикан дараджада чиновниклени, муниципал къуллукъчуланы ишлеринде да табылгъандыла. Ала тюзелгенден сора, къралгъа 182 мелиуан багъасы мюлк къайтарылгъанды.
Тинтиу органла коррупция бла байламлы 34 терслеу иш ачхандыла. Аланы тогъузу улху алыу бла байламлыды. Республиканы сюдлери 13 адамны юсю бла 11 терслеу ишге къарагъанды», – деди Боташланы Радмир.
Андан сора КъЧР-ни Башчысыны Коррупциягъа къаршчы ишлеге къарагъан управлениесини, Къарачай-Черкесияны Джамагъат палатасыны къуллукъчулары, коррупциягъа къаршчы бардырылгъан ишлени хакъындан сёлешиб, аланы башламчылыкълары бла этилген ишлени юслеринден терен хапар айтдыла. Тюбешиу ушакъ халда бардырылды, сорулгъан соруулагъа толу джууабла берилди. Джыйылгъанла коррупция хал къурагъанлагъа къаршчы биригиб ишлерге кереклисин чертдиле.
Узеирланы Хусей.
