Къарачай халкъны туугъан джуртуна къайтханыны 69-джыллыгъына аталыб, республикабызны шахарларында, районларында джарыкълыкъ ишле ётгендиле. Ол байрам Зеленчук районда да кенг белгиленнгенди.

Байрамны аллы бла районну окъуу учреждениелерини сохталарыны арасында «Вернулись мы в наш дом родной» эмда «Мой край родной – Карачай» деген конкурсла бардырылгъандыла. Сабийле Къарачай халкъны джангырыу кюню бла байламлы суратларын конкурсха теджегендиле. Аны бла да къалмай, районну школларында «Живи и процветай, мой Карачай», «Боль моего рода», «Горы помнят, но молчат…» деген темалагъа ачыкъ дерсле, тюбешиуле, джарыкълыкъ ишле ётгендиле.
Хычаман айны 3-де, къарачай халкъ туугъан джуртуна къайтхан кюн, Зеленчук стансени паркында кёчгюнчюлюкге аталгъан эсгертмени къатында митинг болгъанды. Анга Зеленчук районну администрациясыны башчысы Марина Брыкина, район советни депутатлары, джамагъат эмда дин бирлешликлени келечилери, районну учреждениелерини къуллукъчулары, стансечиле дагъыда башхала къошулгъандыла.
Алгъы бурун джыйылгъан джамагъат, кёчгюнчюлюкню джылларында ёлгенлени эсгере, дууа этгенди. Ызы бла митингде талай адам сёлешгенди.
«Тарихде болгъан затланы эсибизде тутаргъа, ала бла джаш тёлюню шагъырей этерге борчлубуз. Къарачай халкъны джангырыу кюню шохлукъну, бирикмекликни байрамыды. Къарачайлыла кёб къыйынлыкъ кёрселе да, туугъан джуртларына къайтыргъа ышанмакълыкъларын тас этмей джашагъандыла. Бюгюнлюкде Къарачай-Черкесияны миллетлери бары да биригиб, республикабызгъа ёсюм алдырыб кюрешедиле. Мындан ары кёчгюнчюлюкча къыйынлыкъны бир миллет да сынамасын. Барыгъызны да байрам бла алгъышлай, джетишимле теджейме», – дегенди Зеленчук районну администрациясыны башчысы Марина Брыкина.
Андан сора митингге къошулгъанла бир такъыйкъаны шошлукъгъа бёлениб, ёлген джердешлерибизни эсгергендиле. Ызы бла джыйылгъан джамагъат эсгертмеге гокка хансла салгъанды.
Митингден сора Зеленчук районну Джарыкълыкъ къаласында концерт бардырылгъанды.
Ары келгенлени алларында Зеленчук районну Советини председатели Ижаланы Хусей сёлешгенди. Ол джыйылгъанланы байрам бла алгъышлагъанды, республиканы миллетлерини арасында бирикмекликни, шохлукъну магъанасын чертгенди, концертни къурагъанлагъа да разылыгъын билдиргенди.
Концертни кёзюуюнде районну артистлери, Ата джуртха, туугъан джерге сюймекликге, шохлукъгъа, бирикмекликге аталгъан джырланы джырлаб, тепсеу къауумла да чемерликлерин кёргюзюб, джамагъатны къууанчха бёлегендиле.
Джарыкълыкъ къаланы фойесинде Зеленчук районну ара библиотекасыны къуллукъчулары «Возрождение. Продолжение жизни» деген кёрмюч къурагъандыла. Анда эски суратла, архив къагъытла, китабла, къарачайлыланы тарихлерини, маданиятларыны юслеринден материалла теджелген эдиле.

(БИЗНИ КОРР.).