Адетге кёре, Уллу Хорламны аллы бла Къарачай-Черкес Республиканы сабий библиотекасы «Читаем детям о Великой Отечественной войне 1941-1945 гг.» деген теманы юсю бла 17-чи кере бардырылгъан халкъла арасы акцияны ишине къошулгъанды. Акцияны баш иши 15 джыл болгъан сабийлеге къазауатны тюрлю-тюрлю урушларыны юслеринден иги джазылгъан чыгъармаланы окъуу болгъанды.
Библиотеканы къуллукъчулары, акцияны джакълай, сабийлени патриотизм, граждан сезимлерин къозгъагъан чыгъармала да окъугъандыла, башха ишле да бардыргъандыла. Окъуучула, «Во имя Великой Победы», «Нам книга память оживит», «Мы читаем о войне», «Стихи, рождённые войной», «Доброе слово о храбром солдате» деген ат бла бардырылгъан ишлеге къошулгъандыла. Библиотеканы къуллукъчулары сабийлеге Уллу Хорламны магъанасыны юсюнден терен хапар айтхандыла. Бизни аскерчилени ачы урушлада джигитликлеринден, тылда кёргюзюлген джигерликледен хапарлы этгендиле. Ушакъ халда къуралгъан тюбешиуню кёзюуюнде «Идёт весна победным маем», «Войны священные страницы», «Дети-герои», «О Родине, о подвигах и славе» деген ат бла электрон презентацияла бардырылгъандыла. Сабийлеге «Детям о войне», «Юные герои Великой Отечественной войны», «Дети войны», «Сын полка», «Офицеры» деген атла бла слаидла, видеоматериалла, суратлау киноладан кадрла кёргюзюлгендиле, къазауатны заманында джазылгъан назмула окъулгъандыла.
Къазауатны къыйынлыгъын кёрген, анда джигитлик танытхан ветеранла аздан аз болуб барадыла. Ала сау болсала, гитчечиклеге кёзлери бла кёргенлерин, сынагъанларын айтырыкъ эдиле. Алай болса да, къазауатны юсюнден проза, поэзия халда кёб китаб джазылгъанды. Алада назмула, поэмала, хапарла, повестле, романла, башха адабият чыгъармала бардыла. Окъуучула бизни тарихибизни къайсы бир заманы бла да танышырча мадар табадыла.
Акцияны кёзюуюнде сохталагъа, школгъа дери сабийлеге къарагъан бёлюмню къуллукъчулары, аланы белгили джазыучу-тарихчи С.П.Алексеевни чыгъармачылыгъы бла танышдыргъандыла. Алайда СВО-гъа къошулгъан Максим Сергеевич бла да тюбешгендиле. Ол тюбешиуню «Защитники Отечества» кърал фондну КъЧР-де филиалыны социал координаторлары къурагъандыла. Сабийле къазауатны юсюнден соруула соруб, ол да алагъа джууаб бергенди. Окъургъа эмда сюзерге деб, «Великая Московская битва» деген чыгъарманы сайлагъандыла. Сабийле «Отдельный танковый батальон» деген хапаргъа да терен эс ийиб тынгылагъандыла.
Акцияны кёзюуюнде сабийлеге къазауатны юсюнден джазылгъан дагъыда кёб чыгъарманы окъугъандыла. Сохтала, Уллу Хорламны байрамына атаб, тюрлю-тюрлю суратла салгъандыла.
Библиотеканы бёлюмлеринде, Уллу Ата джурт къазауатны юсюнден хапар айтхан китаб тапхала таб джарашдырылгъандыла, школчулагъа хайыр келтирген башха ишле бардырылгъандыла.
Къазауатны юсюнден джазылгъан иги китабла сабийлени патриотлукъгъа, рахат джашауну багъалатыргъа, арада шохлукъну бегитирге, юретедиле, бирикмекликге чакъырадыла.
Бу акциягъа Черкесскени 5 школу бла сабий садларындан бютеулей да 260 сабий къошулгъанды.
Тамаева Л.,
библиотеканы бёлюмюню тамадасы.
