Никкол (июнь) айны 12-де Черкесскеде Халкъланы шохлугъуна аталгъан стеланы къатында джаш тёлю къралны байрагъын ёрге кёлтюргенди. Аны уллулугъу 60 метр болгъанды.

– Къарачай-Черкесия бютеу кърал бла бирге Эресейни кюнюн – Халкъланы бирлигини, Ата джуртха чексиз сюймекликни, бирикмекликни байрамын – белгилегенди. 60-метрлик байракъ ол затха толу шагъатлыкъ этгенди, – деб чертгенди КъЧР-ни Башчысы Темрезланы Рашид.
Джаш тёлю, байракъны да уллу ёхтемлик бла кёлтюрюб, стеладан каскад атлауучла бла «Джашил айрымкан» деген маданият-солуу паркга тюшгенди.
– 60-метрлик байракъ кёб миллетли къралыбызны бирлигини белгисиди. Аны, бир сафха тизилиб, «Мени Эресейим! Мени къралым!» деген тепсеу флешмобха къошулгъанла уллу кёл кёлтюрюлюм бла паркга элтгендиле. Бу ашхы башламчылыкъны «Кавказ» халкъ тепсеу ансамблни солистлери, спорт эмда окъуу-билим берген школланы сохталары да джакълагъандыла, – деб джазгъанды Черкесск шахарны мэри Алексей Баскаев кесини соцсетлеринде.
Черкесск шахарны джаш тёлюсю бу патриот акциягъа бек сюйюб къошулгъанды, Ата джуртха сюймеклигин танытханды. Аны кибик республикада «Биз биргебиз» деген фестивалны тамалында патриот акцияла, мастер-классла, кёрмючле, концертле бардырылгъандыла.