Къарачай-Черкесияны аналары Эресейни кюнюнде джуртларына саугъа этгендиле – республикан сабийле туууучу юйде эки джашчыкъ бла бир къызчыкъ туугъандыла. Ол сабийлени бири бешинчи сабий болуб къошулгъанды юйдегиге. Бу затны Къарачай-Черкес Республиканы Башчысы Темрезланы Рашид сансыз этиб къоймагъанды.

– Таза джюрекден джангы туугъан сабийлени, аланы аталарын-аналарын эмда джууукъларын бу уллу насыб бла алгъышлайма. Эм игиси уа неди десенг, сизни туугъан кюнюгюз уллу байрамгъа – Эресейни кюнюне – тюшгенди.
Биз бюгюн деу къралыбызгъа, аны бай тарихине, джетишимлерине, тутхан джолуна багъа беребиз. Къайсы бир къралны да келир заманы сабийледиле. Сизсиз келир заманда джашарыкъла, республикабызны, бизни Эресейибизни да атын айтдырлыкъла.
Сиз уллу джашау джолну къыйырындан киргенсиз. Аллыгъызда ашхы тенгле, школ джылла, джетишимле, хорламла да сакълайдыла. Халал, кирсиз иннетли, кючлю, юйдегигизни, Къарачай-Черкесияны эмда деу къралыбызны сюйген адамла болуругъузну излейме. Биз да, бизни сабийлерибиз инджилмей, джукъ керекли болмай, насыбдан толуб ёсерча, терен билим алырча, муратларына джетерча, фахмуларын ёсдюрюрге мадар табарча болум къурар ючюн, мындан ары да кюрешгенлей турлукъбуз, – дегенди КъЧР-ни Башчысы Темрез улу.