Бюгюнлюкде республиканы мингле бла сабийлери джайгъы лагерледе солуйдула, кюч-къарыу аладыла.

Быйыл планда белгиленнгенине кёре, 12 минг сабий джай кёзюуде лагерлеге джюрюрюкдю. Ала джетиден онджети джылгъа дери сохталадыла. 2026-чы джыл Къарачай-Черкесияда 110 лагерь ишлейди. Ала школлада эмда шахарладан тышында орналгъандыла.
Ашхы адетге кертилик таныта, быйыл Луганск Халкъ Республиканы Старобельск округундан келген сабийлеге джылы тюбейди регион. Бютеулей да бизде быйыл 750 сабий солурукъду, ол сандан 370-и, КъЧР-де солуб, ызларына къайтхандыла, къалгъаны бизге къыркъаууз (сентябрь) айда келликди.
Сабийле, ариу джерледе солугъан бла къалмай, билимлерин ёсдюрюрге да мадар табадыла. Сабийлени ангыларын, патриот сезимлерин, хунерлик джилтинлерин ёсдюрюрча джарашдырылгъанды программа. Эресейни халкъларыны бирлигини, Къарачай-Черкесияны халкъларыны тин-иннет эмда маданият хазнасыны джылына аталыб да кёб тюрлю мероприятие бардырылады – ол затны сабийле кёрюб, ангылаб турадыла.
Тыйыншлы санагъатланы эмда «Бирикген Эресей» партияны келечилери сабийлени таймаздан джокълагъанлай, аладан хапар билгенлей, къоркъуусузлукъларына ажымсыз болгъанлай, санитар болумларына къайгъыргъанлай турадыла.