Бу кюнледе, Текстиль эмда дженгил промышленностну ишчилерини кюнюне аталыб, Къарачай-Черкес Республиканы Правительствосуну Юйюню Гитче залында къууанч джыйылыу болду. Анга ол санагъатха къарагъан министерствону къуллукъчулары, депутатла, алчы ишчиле джыйылгъан эдиле.
Биринчи сёз Къарачай-Черкес Республиканы промышленность бла энергетиканы хакъындан министри Гапов Муратха берилди. Ол бу санагъатны джетишимлерини юсюнден хапар айтды.
«Къарачай-Черкес Республиканы Башчысы Темрезланы Рашидни атындан сизни, юйдегилеригизни, урунуу коллективлени санагъат байрамыгъыз бла алгъышлайма. Сизге, дженгил промышленностда ишлегенлеге, хайырлы, ашхы джетишимлеге ие болгъаныгъыз ючюн, разылыгъымы билдиреме. Сиз, терен магъанасы болгъан ишни баджарыб, джукъгъа джарсыу келтирмей, таукел алгъа барасыз. Республиканы башчылыгъы хар заманда бу санагъатха болушханлай турады. Бусагъатда республиканы дженгил промышленностунда 414 энчи предприниматель, 83 организация иш бардырады. Кёбле биледиле, республиканы Башчысы Темрезланы Рашидни аманатын толтура, алагъа налогла бла байламлы таблыкъла къуралгъанларын. Ол таблыкъла бла 2024-чю джыл 150 предприятие эмда энчи предприниматель хайырланнганды. 2025-чи джыл а, ол сан 500-ден атлагъанды. Аллай ишле мындан ары да бардырылгъанлай турлукъдула.
Быйыл Санкт-Петербургда бардырылгъан халкъла арасы экономика форумда Къарачай-Черкес Республиканы ёсюмю бла байламлы талай кесамат этилгенди. Ала адамлагъа хайыр келтирлик ишлени баджарыргъа джарарыкъдыла. Анда бизни республикадан 70 компанияны ишчилерин, энчи предпринмателлени билимлерин ёсдюрюуню юсюнден да сёлешиннгенди. Ол зат КъЧР-ни Правительствосу бу санагъатха терен эс бёлгенин кёргюзеди. Мындан ары да сизни багъалатханлай, болушлукъ кереклиге эс бёлгенлей турлукъбуз. Байрам кюнюгюзде сизге къууанч, насыб, ишигизде джангы джетишимле теджейме», – деди министр.
Ол алчыланы, ашхы джетишимлени иелегенлени саугъалады. Былайда кёбле Хурмет грамотала алдыла.
КъЧР-ни Халкъ Джыйылыууну (Парламентини) атындан Промышленностха, транспортха, къурулушха, связь бла энергетикагъа къарагъан комитетини тамадасы Крым Шнахов, бу санагъатчыла республиканы экономика ёсюмюне уллу юлюш къошханларын чертиб, аланы джылы алгъышлады, чыгъармачылыкъ ишлеринде джангы джетишимле теджеди.
Аны ызындан КъЧР-ни Халкъ Джыйылыууну (Парламентини) депутаты эмда «Бирикген Эресей» партияны «Предпринимательство», «Выбирай своё» деген проектлерини координатору Игорь Гонов да санагъат ишчилени ашхы байрамлары бла алгъышлаб, алагъа «Бирикген Эресей» партияны саугъаларын берди. Тюрлю-тюрлю халкъланы келечилери къууаныб, бетлерине нюр уруб, бир-бирин алгъышлай, республикабызгъа, къралыбызгъа тынчлыкъ, рахатлыкъ, мелхум джашау теджей чачылдыла.
Бу къууанч джыйылыуну Къарачай-Черкес Республиканы Промышленность бла энергетиканы хакъындан министерствосу бардырды.
Лепшокъланы Хусеин.
