Уруп районну Преградна стансесинде орналгъан ипподром, мукъладис темирни тартханча, ат чабдырыу спортну сюйгенлени кесине тартханлай турады. Алайды да, мындан алда анда чарс оюнланы эришиулери ётгендиле. Быйыл Эресейни халкълакъларыны бирлигини эмда Къарачай-Черкесияда джашагъан миллетлени тин-дин байлыкъларын сакълауну джылы болгъаны себебли, эришиуле анга аталгъан эдиле.
Къууанч джыйылыуну республикабызны Башчысы Темрезланы Рашидни атындан КъЧР-ни Парламентини Председателини орунбасары Чеккуланы Хызыр хошкелди сёзю бла ачды. Ызы бла Къарачай-Черкес Республиканы Халкъ Джыйылыууну (Парламентини) Саулукъ сакълауну, социал политиканы эмда спортуну хакъындан комитетини председатели Хубийланы Хасан, Эресей Федерацияны махтаулу врачы, КъЧР-де ауругъанланы саулукъларын бакъгъан эмда реабилитация этген аралыкъны баш врачы Темрезланы Бориспий, Уруп муниципал районну депутат Советинини тамадасы Боташланы Азрет-Алий, Уруп муниципал районну администрациясыны башчысы Михаил Зайцев, «Къарачай – алан халкъ» джамагъат бирлешликни баш советини къурамына кирген Гаталаны Александр сёлешдиле. Къарачай-Черкес Республикада джашагъан халкъланы адетлерин эмда тиндин байлыкъларын сакълау, халкъла арасы шохлукъну къаты тутуу республиканы айныууну баш ёзеги, эм къаты джибеги болгъанын айтдыла ала.
Спортну бу тюрлюсю республиканы тарихинде энчи орун алгъанын да чертдиле. Джаш тёлюге бу спортну юсю бла ата-бабаларыбыздан келген ашхы адетлерибизни сингдирирге, тин байлыкъны сакъларгъа юретирге кереклисин да сагъындыла.
Эришиуле къууанч халда ётдюле. Ала джети тюрлю чурумгъа аталыб бардырылдыла:
1. Эресейни Джигити авиацияны генерал-майору Боташланы Къанаматны сыйына аталыб, 1400 метр узакълыкълыкъгъа ат чабдырыу, 300 минг сом ачха ёчге;
2. Къарачай халкъны туугъан джуртуна къайтханыны 69-джыллыгъына аталыб, 1400 метр узакълыкълыкъгъа ат чабдырыу, 300 минг сом ачха ёчге;
3. Къобан къазакъланы реабилитация кюнлерине аталыб, 1400 метр узакълыкълыкъгъа ат чабдырыу, 300 минг сом ачха ёчге;
4. Къарачай-Черкес Республиканы Башчысы Темрезланы Рашидни саугъасына, 4200 метр узакълыкъгъа ат чабдырыу, 500 минг сом ачха ёчге;
5. Уллу Хорламны 81-джыллыгъына аталыб, 2400 метр узакълыкъгъа ат чабдырыу, 300 минг сом ачха ёчге;
6. Эресейни халкъларыны бирлигине эмда шохлугъуна аталыб, 4200 метр узакълыкъгъа ат чабдырыу, 300 минг сом ачха ёчге;
7. Уруп районну ат чабдырыучуларыны эришиулери, 1000 метр узакълыкъгъа, 200 минг сом ачха ёчге.
Эришиулеге къошулгъанланы хар бири да, хорламгъа учунуб, тамам кючлю кюрешдиле. Ала бек иги хазырланыб келгенлери таныла эди. Эришиулени эсеблерин чыгъарыб, хорлагъанлагъа тыйыншлы саугъала берилдиле.
Эришиулени республикада белгили артистле, джырчыла, тепсеу коллективле аламат концерт бла тамамладыла.
(БИЗНИ КОРР.).
