КъЧР-ни Башчысы Темрезланы Рашид бусагъатха дери Эресейни МЧС-ни КъЧР-де Баш управлениесине башчылыкъ этиб тургъан, бюгюнлюкде башха джууаблы къуллукъгъа кёчюрюлген Александр Голоколенко бла тюбешгенди.

Тюбешиуде Темрез улу Александр Гологоленкогъа талай джылны республиканы власть эмда кеси башларына оноулу джергили органлары бла чарпыуланы юслеринде да, профилактика бардырыуда да келишиулю иш джюрютюб тургъаны ючюн, разылыгъын билдиргенди.
Аны юсюнден МАХ мессенджерде кесини къаналында Темрез улу:  «Александр Федорович Эресейни МЧС-ни КъЧР-де Баш управлениесине башчылыкъ 2020-чы джыл этиб башлагъан эди. Андан бери бизни регионда МЧС-ни бютеу бёлюмлери да игирек ишлегенлери танылыб турду. Эресейни МЧС-ни башчылыгъы кёлтюргюч- люк этиб, КъЧР-де управлениени материал-техника базасы джангыртылды. Бюгюнлюкде анда тамам уста адамла ишлейдиле.
Айырыб айтыргъа излегеним, МЧС-ни бизни регионда къуллукъчулары ишлерине джууаблы къарайдыла, адамлагъа иги эс бёледиле.  Аланы алай этгенлери бла къыйын болумгъа тюшген адамла дженгил огъуна болушлукъ табадыла. Республиканы ичинде чарпыгъанлагъа болушханлары бла бирге ала Эресейден тышына гуманитар джюклени элтирге да къарайдыла.
 Ала мындан ары да былай келишиулю ишлериклерине ышанама. Александр Федоровичге да джангы къуллугъунда джетишимле те- джейме», – деб джазгъанды.