Къарачай-Черкесияны волонтёрлары «Всё для Победы!» деген ёчню лауреатлары болгъандыла.

Шимал Кавказ кърал академияны волонтёрлары Халкъ фронтну «Всё для Победы!» деген ёчюню лауреатлары болгъандыла. Аланы саугъалаугъа аталгъан къууанчда РФ-ны Президенти Владимир Путин: «Бизни кючюбюз бютеу къоркъууладан сакъланыргъа, не тюрлю сынаудан да сый бла ётерге амал табханыбыздады. Алай бла, кючюбюзню къатлай, алгъа таукел барабыз», – дегенди.
Джыйылыуда волонтёрлагъа джораланнган сыйлы саугъа Шимал Кавказ кърал академияны Медицина институтуну тамадасыны орунбасары Къочхарланы Эльдаргъа берилгенди.
КъЧР-ни Башчысы Темрезланы Рашид ол сюйюмчюню МАХ мессенджерде кесини каналында баямлагъанды.
«Джангы регионланы адамларына гуманитар джюк джыйышдырыуда тирилик танытханлары, СВО-гъа къошулгъанлагъа, аланы юйдегилерине болушханлары ючюн бизни джаш тёлюбюзге – ШККъА-ны волонтёрларына – быллай сыйлы саугъа берилгенине бек къууандыкъ.
Аскер къаугъа башланнганлы академияда аскерчилеге болушлукъ этиуню хакъындан волонтёр аралыкъ ишлейди. Кёзюу-кёзюую бла Медицина институтда окъуй тургъан студентледен 350 джаш адам Къоруулау министерствону Дондагъы Ростовда госпиталларына барыб, анда экишер ыйыкъ туруб, врачлагъа болушуб къайтыучандыла. Аскер къаугъа башланнганлы ШККъА ары 80 тонна гуманитар джюк ашыргъанды.
Быллай къайгъырыулу джаш тёлюбюз болгъанына хакъ джюрегим бла ёхтемленеме. Къарачай-Черкесияда фронтха болушлукъ этген энтда кёб бирлешлик барды. Аланы къурамларына киргенлеге, аскерчилерибизге кёл бергенлери, барыбызгъа да магъаналы ишге тири къошулгъанлары ючюн, бюсюреу этеме. Сизден, къралыбызны сизнича къайгъырыулу адамларындан болушлукъ, джылыу табхан аскерчиле бютеу Эресей алагъа джан аурутханын, кёлтюргючлюк этгенин сезедиле», – деб джазгъанды.