Чегетледе законсуз, джорукъсуз агъач кесиуге къаршчы быйыл джылны биринчи джарымында кёб зат этилгенди. Айтыргъа, чегет инспекторла таймаздан чегетледе айланнганлай, джорукъ бузуучуланы джолларын кесгенлей тургъандыла.

Алай бла, джылны биринчи кесегинде чегет мюлкде инспекторла 2550 кере болгъандыла. Ала джорукъну бузулгъанын тогъуз джолда эсеблегендиле, ол зат былтырны бу кёзюуюнден эсе 3-ге азды. Аны бла да къалмай, быйыл джылны биринчи джарымында чегет мюлкню юсю бла тюшген заран 2,8 мелиуаннга аз болгъанды.
Алайды да, быйыл джорукъну бузгъанланы ачыкълау иги джюрюш алгъанды. Заран келтиргенлени ишлери сюдге тюшгендиле. Бюгюнлюкде РФ-ны Терслеу Кодексини 260-чы статьясына кёре 7 терслеу иш ачылгъанды. Тёртеулен, кеслери разы болуб, чегетге салгъан заранларын тёлегендиле.
2026-чы джыл информацион-пропагандист ишге аслам эс бёлюннгенди. Кёбчюлюк информацияны мадарларында 200-ден аслам материал бла сюжет чыкъгъандыла. Социал сетледе – 1,5 мингден артыкъ.
Чегетчиле эмда ич ишлени къуллукъчулары, биригиб, чегетлеге айланыб, джорукъ бузгъанланы айыбха тартханлары бла байламлы республиканы чегет байлыгъына хыянат салгъанланы саны азая барады.