Къарачай-Черкесияда 2026-чы джылда алты сабий садха тамамлы ремонт этиле турады.

Ала республиканы джер-джеринде орналгъандыла: Черкесскеде, Къарданик станседе, Апсуа бла Учкулан элледе, Кавказский бла Бавуко посёлоклада. Бу объектлени барысында да атыллыкъ затланы атхандыла, оюллукъ джерлени да ойгъандыла. Къурулушчула мекямланы башларын, тыш къабыргъаларын, терезелерин, эшиклерин джангыртыб эмда ауушдуруб кюрешедиле. Бир къауум джерледе инженер сетлени тартыб, ичлерин джарашдырыб башлагъандыла.
Айтыргъа, Черкесскеде «Ручеек» сабий садны башын ауушдургъандыла, джангы ток чыбыкъланы тартхандыла, джангы терезеле салгъандыла, полла джылы болурча этгендиле. Къурулушчула энди мекямны ичин заманны излемине келишдириб кюрешедиле.
Озгъан джылда, «Юйдеги» проектни джашаугъа сингдире эмда «Бирикген Эресей» партияны халкъ программасына джол бере, Терезе элде «Къууанч», Черкесскеде «Аленушка» сабий садла адамыча джарашдырылгъандыла. 2025-чи джылдан 2027-чи джылгъа дери, планда белгиленнгенине кёре, 14 сабий сад джангыртыллыкъды.
Ол зат сабийлеге ашхы болумлада ёсерге, ойнаргъа, окъуу-билим алыргъа мадар берлигине сёз джокъду.