Адамла джумушларын дженгилирек эмда асыулу баджарыр ючюн, Къарачай-Черкесияда сан (цифра) технологияланы джашаугъа сингдириуге уллу эс бёлюнеди.

Айтыргъа, «Школа мэров» программаны тамалында бизни республикадан Эресей Федерацияны Президентинде кърал управлениени баш школу РАНХиГС-ге эки проект теджелгенди.
КъЧР-ни промышленность бла энергетика министрини биринчи орунбасары Эриккенланы Рустам 158 проектден эм игиге сайланнган 29 проектни бирини авторуду.
Проект узун бюрократ процедураланы бир сан (цифра) пространствогъа джыйыб, талай айгъа созуллукъ ишни 14 кюннге тындырыргъа мадар береди. Бу проект республикада инвестицион болумну игилендирирге себеб боллукъду.
Черкесскени мэрини орунбасары Елена Иенсен-Данильчук да джетишимли джакълагъанды кесини проектин эмда окъуу программаны тамамлагъанды. КъЧР-ни Джаш тёлю ишлерини хакъындан министерствосундан кёлтюргючлюк табыб, «ПРОактив» экосистеманы теджегенди.
Анда сёз сан плотформаны тамалында студент джаш тёлюню социал эмда джамагъат проектлеге илешдириудю.
Эки проект да бюгюнлюкде джангы технологияланы тамалында адамланы джашауларын игилендирирге, алагъа кёб тюрлю таблыкъ къураргъа боллугъун бегитедиле, ол себебден, эки проектге да уллу багъа берилгенди.