СВО баргъан джерде, аскер борчун толтура, джан берген Николай Важинскийни сыйына аталыб, Зеленчук районну Сторожевой стансесинде эркин тутушдан эришиуле ётгендиле.

Эришиулени Сторожевой стансени администрациясыны башчысыны борчларын толтургъан Акъбайланы Ислам бла 20096-чы аскер бёлекни командири Сергей Прибытков ачхандыла. Ала быллай эришиуле джаш тёлюню саулукълу джашаугъа кёллендирирге, ариу халиге юретирге джарагъанлары бла бирге Ата джуртларын къоруулай джан берген джердешлерибизни атларын эсде тутаргъа себеблик этгенлерин чертгендиле.
Спортчула 19 тюрлю ауурлукъда эришгендиле. Аланы арасында эм гитче 32 килограмм, эм уллусу да 100 килограмм болгъандыла.
Спортчу джашла, кючлерин-къарыуларын аямай, усталыкъларын танытыб джыгъышхандыла. Эсеблеге кёре, хар ауурлукъда хорламлыла белгиленнгендиле. Алагъа хурмет грамотала, медалла, саугъала берилгендиле.
Николай Важинский, аскер борчун толтура, 2025-чи джыл къыркъар (август) айны 10-да ёлгенди. Ол граната-пулемёт взводну командири болгъанды. Николай джауланы дронларындан джаралы болгъан нёгерине болушлукъ этерге бара тургъанлай, эвакуацияны кёзюуюнде джау аскерлени окълары тийиб ёлгенди. Салыннган борчланы айыбсыз толтургъаны эмда джигитлик танытханы ючюн, Николай Важинский ёлгенинден сора Ётгюрлюкню ордени бла саугъаланнганды.

(БИЗНИ КОРР.).