Бу кюнледе республикан аралыкъда джашагъан 20 джыл болгъан джаш Эресейни МВД-ны Черкесск шахарда бёлюмюне барыб, хыйлачылагъа кесин алдатханын билдиргенди.

Ол айтханнга кёре, быйыл никкол (июнь) айны 9-да биреулен къонгурау къагъыб: «Мен курьерме. Сизни атыгъыз бла посылка келгенди. Аны алыр ючюн, СМС бла келген кодну айтыргъа керексиз», – дегенди. Бир кесекден джаш адамгъа «Госуслуги» порталда аны энчи кабинетине ким эсе да кириб, биреуленни атына ышаныу къагъыт (доверенность) джарашдыргъаныны юсюнден билдириу келгенди.
Ызы бла джаш адам билдириуде джазылгъан телефон номерге къонгурау къакъ- гъанды. Аны бла РФ-ны Цифра ёсюмюню министерствосуну, Росфинмониторингни, ФСБ-ны «къуллукъчулары» сёлешиб, аккаунтуна тыш адамла киргенлерин билдиргендиле, аманлыкъчылагъа къаршчы турур ючюн, видеоконференциягъа къошулургъа кереклисин да айтхандыла. Джаш адам ала излегенча этгенди. Видеоконференция- ны кёзюуюнде хыйлачыла: «Ачхангы къоркъуусуз счётха кёчюрюрге керексе. Аны ючюн эм алгъа ачха законнга-джорукъгъа кёре тюшгени бла къалгъанын тинтерге тыйыншлыды», – дегендиле.
Джаш адам хыйлачылагъа ийннганды. Асыры джунчугъандан ала айтханны этиб баргъанды. Алай бла, юйде анасы асыраб тургъан 960 000 сомну элтиб, Пятигорскеде сатыу- алыу аралыкъда банкомат бла хыйлачыла айтхан счётха ашыргъанды.
Къарачай-Черкесияны сыйлы джамагъаты! Сиз танымагъан адамладан келген билдириуледе джазылгъанны эс бёлюб окъугъуз, анга багъа бере билигиз. Артыкъсыз да сизни къоркъутуб, ачхагъызны кючлерге излегенледен сакъ болугъуз. Эсигизде болсун: джорукъ сакълаучу органланы къуллукъчулары адамлагъа къонгурау къагъыб неда мессенджерледе байламлылыкъгъа чыгъыб, ачхагъыз- ны ары-бери ашырыгъыз деб дауламайдыла. Алай къуру да хыйлачыла этедиле.

КъЧР-ни МВД-ны пресс-къуллугъу.