Озгъан джыл Къарачай-Черкесияда бек магъаналы конференцияла, олимпиадала, спорт эришиуле, форумла болгъандыла. Алагъа джаш тёлю тири къошулгъанды. Ол ишлени биринде Ёзденланы Наурусну къызы Альбина атын айтдыргъанды. Ол «Инновационный центр для людей с ограниченными возможностями здоровья» деген проектин Лондонда, Эресей-Британия форумда джакълагъанды.

- Проектни баш магъанасы илму бла техниканы ахыр джетишимлерин саулукъларында къыяулары болгъанлагъа теджеудю. Британиядан эксперт Чарльз Хендри мени оюмуму джакълаб, аны джашауда бардырыргъа кереклисин айтды. Узаймай ол иш башланыр деб ышанама. Бу муратыбыз толса, тышына-затха барыб къыйналмай, адамла джашагъан джерлеринде огъуна терен билимлери болгъан усталадан болушлукъ табыб турлукъдула, - дейди Альбина.

Ол бегитгеннге кёре, проектде айтылгъанланы тамалында къыяулу адамлагъа джараргъа аралыкъла ишлениб, керекли затла бла баджарылсала, болушлукъ керекли адамла къыйналмай, джунчумай себеб табарыкъдыла. Аллай аралыкъ «Архыз» посёлокда ишленирге тыйыншлыды. Нек десегиз, бу курорт ёсюмню джолундады да, керекли затланы эте барыргъа табды. Аны юсю бла бизни республикагъа инвестиция келирге да боллукъду. Эм игиси уа аллай адамла туризмде да орун аллыкъдыла.

Эресей-Британия бизнес форум хар джылда бир кере болгъан, политика эмда иш джюрютген къауумла къошулгъан уллу джыйылыуду. Анда дунияда инсанланы бары да эс бёлюрча затлагъа къаралады. Былтыр «Партнёрство в инновациях» деген темагъа аталыб, талай сессия, «тёгерек стол» да къуралыб, сёлешген эдиле джыйылгъанла.

Ёзденланы Альбина Къарачай-Черкесияда болгъан тюбешиулеге, тюрлю-тюрлю темаланы сюзюуге, социал проектлени джарашдырыугъа къошулуб келеди. «Карачаево-Черкесия» РИА-ны спецпроектинде «Гордость республики» деб, джашауну къайсы санагъатында болса да джетишимле этгенлени атлары айтылады. Аллай адамланы арасында Альбинача проектлерин джакълагъанла бла бирге, спортчула, артистле, устазла, чыгъармачылыкъ ишни усталары дагъыда къыйын кёзюуледе, эс ташламай, тыйгъычланы хорлай билгенле бардыла. Ала миллетде юлгюге айтыладыла.

АППАЛАНЫ Билял.