Хасанланы Альберт Къарачай шахарда 6-чы номерли орта школну сохтасыды, алай а фахмулу сабий болгъаны себебли, аны кёбле таныйдыла. 2013-чю джыл ол 1-чи классха барыб башлагъанды. Биринчи классда огъуна назмуну ариу окъугъаны бла шахарны школларыны арасында 1-чи оруннга чыгъыб, ызы бла Черкесскеде республикан конкурсха къошулгъанды. Былайда да 2-чи орунну алгъанды. Альберт 2-чи классда окъугъан заманда шахарны сохталарыны арасында илму-тинтиу конкурс баямланады. Хасан улу, анга да тири къошулуб, кесини фахмусун танытады. Аны «Лимон» деген тинтиу ишине биринчи орун бериледи.

Кёб да турмай Альберт тамада эгечи Лейла бла Волгоградха джол тутады – анда «Ералаш» тележурналны съёмкаларына джораланнган кастингге къошуладыла, былайда да сабийле хорламлы боладыла, сайлау турдан ётедиле. Сау джылны аланы профессионал режиссёрла бла актёрла актёр усталыкъгъа юретедиле. Окъугъанлары бла бирге ала тюрлю-тюрлю съёмкалагъа къошуладыла. Баш эмда кёбчюлюк ролланы ойнайдыла.

Альберт бла Лейла Б.Ю. Грачевскийни башчылыгъы бла «Ералаш» студияны окъуу проектин тамамлаб чыгъадыла. Алагъа дипломла бериледиле.

Белгилисича, 2015-чи джыл Орус эмда Ана тиллени джылы болуб ётгенди. Къарачай шахарда анга аталыб «Эм иги назму окъугъан» деген конкурс бардырылады. Анда Хасанланы Альберт баш оруннга ие болады.

«Ералаш - 2016» деген сезонну джабылыууна джораланыб уллу концерт хазырлайдыла. Альберт бла Лейлагъа анда къарачайча тепсерге борч салынады. Экиси да ары дери тепсеу бла кюрешмегенлери себебли тепсей билмегенлерин ангылайдыла, алай а артха тура билмеген сабийле, бир ыйыкъны ичине Эртуланы Рамазанны къайгъырыуу бла тепсерге юрениб, хар кимни сейирсиндиредиле. Рамазан «Таулу» деген сабий тепсеу ансамблде ишлегени себебли эки тырмашыулу сабийни да ол школгъа чакъырады. Ала анда кёб затха юренедиле.

2016-чы джылны сентябрь айында Шимал Кавказда биринчи кере «Моданы ыйыгъы» - «Cherkessk Fashion Week» деб уллу мероприятие бардырылады, ол Черкесск шахарда ётеди. Анда Пьер Карденни Мода юйюнден коллекцияны кёргюзедиле, аны кибик Шимал Кавказны белгили дизайнерлерини коллекцияларын да теджейдиле. Ма ол уллу байрамгъа да чакъырыладыла Альберт бла Лейла. Ол мероприятиени программасында «Ариулукъ, мода, фахму» деген конкурс да бардырылады. Анда миллет кийимлени, тюрлю-тюрлю байрамлада кийиучю чепкенлени, костюмланы кёргюзюу да болады.

Альберт творчество конкурсда ариу назму окъуй билгенин да танытыб кеси къурагъан тепсеуню кёргюзтеди. Лейла да, къарнашындан артха къалмай, юч минутну тохтаусуз къызыу сёлешиб жюрини сейирсиндиреди. Экиси да «Моданы ыйыгъыны» Гран-прийине ие боладыла. Аны бла бирге «Мисс КЧР» эмда «Мини-Мистер КЧР» атланы аладыла. Лейлагъа 30 минг сомгъа, Альбертге да 60 минг сомгъа сертификатла бериледиле. Алай бла, къарнаш бла эгешчикге Москвада «World Russian Beauty» фестивалгъа джол ачылады.

Алайды да, 2016-чы джылны сентябрь айында Лейла бла Альберт Москвада уллу фестивалгъа къошуладыла. Ары дунияны 12 къралындан 100-ден аслам конкурсант келеди. Бу конкурсну Москваны Культура департаменти бла «Москонцерт» кърал учреждение къурайдыла. Бардырылгъан конкурслагъа къарагъан жюриге Борис Грачевский башчылыкъ этеди. Бу уллу форумда Альберт юч номинацияда Гран-прийиге ие болады: «Лучший талант России», «Лучшая модель России», «Лучший национальный костюм».

Былайда айырыб бир затха эс бёлюрге тыйыншлыды. «Лучший талант России» деген номинацияда Альберт уллула бла эришгенди. Гран алгъан таулу джашчыкъны Пьер Карденни Мода юйюню вице-президенти баронесса Галина де Буар Франциягъа чакъырады. Анда Пьер Карденни 95-джыллыгъына аталыб уллу къууанч боллукъду. Ол быйыл июлну ал сюреминде ётерикди.

Октябрь айда ол джыл огъуна джаш артист Москваны «Гостиный дворунда» бардырылгъан «Моданы ыйыгъына» къошулады. Жюрини къурамында орус мода индустрияны эм белгили адамы Вячеслав Зайцев да болады. Альберт къарачай кийими бла чыгъады. Аны «Таулу» деген сабий юлгюлю миллет тепсеуню студиясыны дизайнери эмда суратчысы Аджиланы Фатима тигеди. Къызыл джибек къатапа бла дарийден этилген тау кийимли джашчыкъ Кремль къалада белгили болуб бошагъан тепсеую бла къарагъанланы сейисиндиреди.

Алайды да, бизни джаш артистибиз Хасанланы Альберт талай уллу джетишимге ие болгъанды. Аны къралны, шахарны, республиканы ичинде кёб адам таныйды. «Модный дом» журналны тышында «Прорыв года - 2016» деген ат бла аны сураты чыгъады. «Архыз 24» деген телеканалны эртденнги бериуюнде да кёрюнюученди ол. Бир затны этдим деб артына турмай, не затха да джетиширге тырмашыб джашайды Альберт. Айтыргъа, школда да иги окъуй тургъанлай, музыка школгъа джюрюб, гитарада согъаргъа юренеди, эркин тутуш бла кюрешеди, «Эльбрус» кърал ансамблни тамалында къуралгъан Шаманланы Айдарны «Royal Style» деген тепсеу школуна да джюрюйдю. Ол ары ыйыкъда юч кере барады.

Быйыл апрелни 25-де Черкесск шахарны драмтеатрында ол кесини биринчи энчи концертин ётдюргенди. Альбертге болушлукъ этерге республиканы белгили артистлери, джырчылары да къошулгъандыла.

2016-чы джыл Хасанланы Альберт бла Лейланы юйдегилери Къарачай шахарда эм фахмулулугъа саналгъанды. Сёзсюз да, бу затда ата бла ананы магъаналары уллуду. Бютюн да аналары Лаура сабийлерине не джаны бла да джол бериб кюрешеди. Халкъыбызда быллай анала кёб болсала, кеслерини фахмуларын ачаргъа мадарлары боллукъ сабийлени саны ёсерик эди.

Бизни республикада «Болушлукъ» фонд ишлейди. Анга Темрезланы Зухра башчылыкъ этеди. Бу фондну юсю бла кемизли сабийлени юслеринден хапар айтхан суратлау фильм салынныкъды. Бу фильмде Альберт да ойнарыкъды. Ол анда ауругъан сабийлеге болушхан джашчыкъны ролюн баджарлыкъды. Салынныкъ фильмни магъанасы - ауругъан сабийле да къалгъан сабийлечадыла, ала да ойнаргъа да, кюлюрге да, кеслерин сюйдюрюрге да излейдиле. Башхала бла тенглик джюрютюрге да боллукъдула. Ма аллай затны кёргюзюуде Хасанланы Альбертге, ролюн тыйыншлы ойнар деб, ышанмакълыкъ танытхандыла.

Быйыл SMP Racing академия бла «Газпром-детям» деген социал проект биригиб Бютеуроссия турнир бардырыргъа излегенлерин баямлагъандыла. Аны биринчи сайлау этаплары Россияны 21 шахарында апрелни 24-ден бардырылыб тебрегенди. Бу турнирни юсю бла КъЧР-ни джыйым командасына Альберт да киргенди. Мында да джетишимли боллугъуна ишек да джокъду.

Алайды да, таулу джашчыкъ окъууда да, тепсеуде да, джырлауда да, спортда да, кинода да кесин кёргюзте биледи. Аны керти да фахмулу сабий болгъанына таныгъанла барысы да шагъатлыкъ этерикдиле. Бюгюнлюкде ол школну сохтасыды. Уллу болса, кеси тепсеу школ къураргъа излейди. Аны тышында да аны кёб ашхы мураты барды. Уллула ие болалмагъан хорламлагъа джетиб, кесини школуну, шахарыны, республикасыны атын айтдыргъан джашчыкъгъа уллу бюсюреу этген бла бирге, джашауда этген муратларынга джет, дейбиз.

Мамчуланы Дина.