Кёб болмай Байрамукъланы Халимат атлы кърал миллет библиотекада Хапчаланы Салыхны «Къанатлы сёз» деген китабыны презентациясы болгъанды.

Анда сёз Къарачай-Черкес Республиканы халкъ поэти, Эресей Федерацияны Джазыучуларыны эмда Журналистлерини союзларыны члени Лепшокъланы Хусеинни юсюнден барады.

- Китабны презентациясы Къарачай-Черкесия бла Къабарты-Малкъарны арасында шохлукъну бегитиуге аталгъан кесаматха джыл болгъаны бла байламлыды. Поэт Лепшокъланы Хусеин эки республиканы миллетлерини араларында шохлукъну тамырларын терен орнатыр ючюн, кёб зат этгенди, - дегенди Хапчаланы Салых.

Айхай да, китабны презентациясы халкъыбызны кёчгюнчюлюкден тарих Джуртуна къайтханына багъышланнган байрамгъа да аталады. Лепшокъ улу кёчгюнчюлюкню джылларында туугъан тёлюденди.

Хапча улу айтханнга кёре, китабда Лепшокъ улуну джашау эмда творчество джолундан, аны адамлыкъ эмда профессионал шартларындан хапар бериледи.

Хусеин 20-дан аслам китабны авторуду. Аны назмулары Шимал Кавказны халкъларыны литература антологиясында эмда къарачай халкъны литература антологиясында да чыкъгъандыла.

Лепшокъ улуну ишине багъа бериб сёлешгенлени ичлеринде Къарачай-Черкес Республиканы халкъ поэти, «Къарачай» газетни баш редактору Ёзденланы Альберт, профессор Эрикгенланы Ахмат, «Къарачай - алан халкъ» джамагъат бирлешликни тамадасыны орунбасары Боташланы Сулайман дагъыда башхала болгъандыла.

 

 
{jcomments}