Ставрополь крайны Шпаковский районуну Михайловск шахарында больницада бизни джердешибиз, Къош-Хабль элден, Канаматов Азамат да ишлейди. Ол мында эм уста хирургланы бирине саналады. Аллах берген фахмусу болур, джумушакъ къоллу, ариу сёзлю, ишин толу билген адамды. Ауругъан адамны джанына, джау джагъылгъанча, сёзю да балхам бола, ауругъанны инджиуюне ачхыч таба, такъырлыкъ басхан кёлюн ала билген сыйлы атха тыйыншлы врачды Азамат. Аны къолунда ауруб джатхан адамла бюгюн-бюгече да анга разылыкъларын билдиргенлей турадыла. Кесини ишин толу билген уста болгъанына аны КъЧР-ни Правительствосу берген талай Махтау къагъыты эмда бирси кърал саугъалары шагъатлыкъ этедиле.

Бу къыйын санагъатда ишлеб, адамланы аллында да сый, бюсюреу табар ючюн,  джашауда сайлагъан ишин джюреги бла сюерге эмда ауругъанны джашауу ючюн джууаблы болгъанын ангыларгъа керекди.

Врачны иши бек къыйын болгъаны хакъды, артыкъсыз да бек хирургну джумушу ауурду. Азамат кюнюне 5-6 операция этеди. Ауругъан адамны амалсыз джарыргъа керек болса, аны толу баджарыб, андан башха джумушланы медсестраны бойнуна салыб къоймай, кеси да джокълаб, тинтиб, джараларына къарагъанлай турады. Алай бла кечеге дери больницада къалыб да кетиученди. Ауур джарасы болгъан адамны уа хаман халын соргъанлай, бир гитче тарыгъыуу болса да, аны сансыз этиб къоймайды.

- Азаматны юсюнден «ол аламат врачды» деб къойгъан азды, уллу адамлыкъ, ишленмеклик дегенча шартлары бла айырыб айтыргъа тыйыншлыды. Ол, иннети таза, джюреги халал, ашхы адамды. Мен аны къолуна келиб тюшгеним меннге насыб болгъанды деб турама. Операция этгенден сора Азамат ишими бошадым деб, ингирде юйюне кетиб къалмай, меннге келиб, джарамы, кесими халымы соруб, кёлюмю джарыкъ этиб кете эди. Ол къуру меннге этмейди алай. Хар ауругъаннга алай этиб барыр ючюн врачха къаллай бир тёзюмлюлюк, басымлылыкъ керекди. Сау болсун, бек разыма, Аллахдан табсын разылыкъ. Биринчи кюн мени больницагъа, бери келтиргенлеринде, ауруууму ачыгъаны джанымы бир бек инджите эди, дуниям къарангы болуб баргъанча халгъа тюшюб тура эдим. Сора ол кёзюуде Канаматов Азаматны ишлеген кюнюне тюшген эдим кесим да. Алай бла врач мени тарыгъыуума сабыр тынгылаб, керекли дарманны да юретди, ариу сёзю бла ауругъанымы да сорушдурду. Мен аллай врачлагъа бек аз тюбегенме, - деб хапар айтды Хабез элден ауруб джатхан тиширыу Фаризат.

 Канаматов Азамат орта школну тауусхандан сора, Краснодар шахарда медицина академиягъа окъургъа киргенди. Ставрополь крайны, бизни республиканы да больницаларында усталыгъы бла ишлей келгенди. Алай бла сынамын ёсдюрюб, 2008-чи джылдан бери  район больницада хирург болуб ишлейди. Аны къолундан джюзле бла ауругъан адамла ётгендиле. Ала хар бири кесича хирургну джашаууна кесин эсгертген бирер сынам бергенди. Азамат ушагъында талай затны эсине тюшюре келиб, сайлау джол берилсе бу къыйын санагъатны энтда джангыдан сайларын  айтды.

- Адамны джан тамырыны ургъанын къолум бла тутуб, ол аны джашауу мени къолумда болгъанын кёзюм бла кёрсем, ол кёзюуде андан сора дунияда башха джукъну кёрмейме. Нени да унутуб, аны джанын сау къалдырама деб кюрешеме. Мен алай бла кесими борчуму береме. Ауругъан адам  джюрек разылыгъын билдирсе, ма олду эм уллу саугъа бизге. Хар адам да къолундан келгенича, болумуна, билимине кёре кимге да игилик этерге керекди. Къолундан уллу игиликле этерге келмей эсе уа, кесинден тёбен кёрмей, инджилгеннге сынгар ариу сёзюн аямазгъа керекди. Ол иннет бла ёсдюргендиле мени атам бла анам. Мен да аланы унутмазгъа кюреше, ол шартланы баш нюзюр эте джашаргъа кюрешеме, - дейди уста хирург.

Кертиси да, адамны джашаууну багъасын кимден да иги врачла биле болурла. Ауругъан адам кеси кёрмеген затланы врачла тинтиб, тюрлю-тюрлю мадарла бла аурууун ачыкълаб, кёрюб эмда ол джарсыуланы къаушатырлай не джаны бла да хакъ кёллери бла мадар этерге кюрешедиле. Гиппократны антына кертилей къалгъан, врач деген сыйылы атха тыйыншлы болгъан дохтурланы атлары халкъны эсинде ёмюрлюкге сакъланады.

Канаматов Азамат уста хирург болгъандан сора да, юлгюлю атача, элини сыйлы адамыча белгилиди. Ол юй бийчеси бла эки сабийни ёсдюредиле. Бюгюнлюкде юйдегиси бла Ставрополь шахарда джашаса да, туугъан элин, джууукъларын, тенглерин джокъларгъа заман табады. Аны аллын элчилери ашыгъыб сакълайдыла. Азаматха мындан ары да халкъгъа халал къуллукъ эте, кёблени джанларына джарарыкъды, деб ышанабыз.

Туаршева Ира.

«Черкес хэку» газет.