Августну 14-де Нарсана шахарда къарачай миллетни культурасына аталгъан байрам болду.

Ол «Гостеприимный Кисловодск-2017» деген этно-культура фестивалны ышыгъы бла бардырылгъан ишди. Мероприятиени къурагъанла Нарсананы администрациясыны курорт бла туризмни юслеринден управлениеси, культураны хакъындан комитет, къарачай джамагъат организацияла, байрам джарыкъ халда ётер ючюн, кёб къыйын салгъандыла. Ол кюн шахарны курорт бульварында, нарзан ванналаны  къатында, къууанчха къараргъа мингле бла адамла джыйылгъан эдиле. Аллында КъЧР-ни Башчысы Темрезланы Рашидни атындан республикада туризмни, курортланы эмда джаш тёлю политиканы министри Эрикгенланы Анзор хошкелди сёз айтды. Бюгюнлюкде анда джашагъан къарачай диаспора шахарны ёсюмюне магъаналы юлюш къошханын чертиб сёлешди ол. Аны кибик шахар администрацияны, андагъы миллет организацияланы башчылары да къонакъбай тёренчи «хош келигиз» дегенни айтыб джылы сёлешдиле.


- Биз бюгюн Къарачай-Черкесияны эртдегили миллетлерини бирини - къарачайлыланы – культуралары бла шагъырей болабыз. Чемер къоллары, сейир культуралары болгъан тамам ашхы миллетди ол. Къалай игиди бюгюн былайда аны кёзюбюз бла кёрюрге бизге мадар чыкъгъаны. Узакъдан келгенле, курортубузну къонакъларыны къайсы бири да, ол къонакъны сюйген, сыйын сакълагъан эркин миллет болгъанын ангыларыкъды. Бюгюннгю байрам барыбызны да эсибизде къаллыкъды,  деб акъылым алайды, - деди Ставраполь крайны Кърал Думасыны Председатели Любовь Волошина. Нарсанада арт джылланы ичинде бардырылгъан эм джарыкъ мероприятиелени бири бу байрам болгъанын, ол адамланы эслеринде къаллыгъын черте эдиле дагъыда кёбле. Алайда микрофоннга чыгъыб сёлешген сагъатда  ол оюмну Кърал Думаны депутаты Боташланы Расул да айтды. Быллай джумушланы Шимал Кавказ федерал округда джашагъан халкълагъа магъаналары уллу болгъанын черте, бу байрамгъа башламчылыкъ этгени, аны къурагъаны ючюн Нарсананы администрациясына разылыгъын билдирди.
Фестиваль бла байламлы алгъышлауун КъЧР-ни Башчысы Темрезланы Рашид да джылы сёзле бла айтханды.
«Курорт шахарны джамагъаты, аны къонакълары къарачайлыланы адетлерине, халкъ творчествосуна уллу эс бёлюб шагъырей боладыла. Алгъаракъда анда Абаза миллетни культурасыны кюню ётген эди. Фестивалгъа къошулгъанла, къонакъла да бизни республиканы бирси миллетлерини культураларыны кюнлерин да ол халда бардырлыкъларына ишегим джокъду.
Бюгюнлюкде Нарсана шахарны ёсюмю къызыу джюрюш алыбды. Федерацияны Советини спикери Валентина Ивановна Матвиенкону энчи къайгъырыуу бла Бютеуроссия здравницабыз джангы тюрсюн алыб, къууатлыдан къууатлы болуб барады. Бу ариу мероприятие ючюн Ставрополь крайны губернатору Владимир Владимировгъа, Нарсананы мэри Александр Курбатовгъа, бу байрамны къурагъанланы барына да бюсюреу-сыпас. Кёб миллетли Нарсана барыбызгъа да шохлукъну байрамын саугъа этгенинде, ол кеси да бизни регионланы, бютеу къралны да халкъларын бирикдиргенинде да огъур ышан барды», - деб джазгъанды Башчы Инстаграмда.
Ол кюн байрамгъа джыйылгъан джамагъатха кёргюзген аламат концерт программагъа Къарачай-Черкесияны белгили артистлери, творчество коллективлери къошулдула. Чемерлени къол ишлеринден къуралгъан кёрмючлеге, китаб эмда сурат экспозициялагъа къараргъа, къарачай-малкъар миллетлени культураларыны, тарихлерини, адетлерини юслеринден литература сатыб алыргъа мадар табхандыла къараучула. Ол огъай эсенг, ата-бабаларыбыз бурун къалай кийиз басханларын да кёргюзгендиле хунерли адамларыбыз. Аллай мастер-класс кёргюзген сагъатда аланы тёгереклерине джыйылыб, кёб адам сейирсиниб къарагъанды. Аны кибик миллет спорт оюнла да болгъандыла майданда, тойну, къобузну, харсны да джарыкъ тауушлары кенгнге джайылыб, къууанч ингирге дери баргъанды.


Ёзденланы Якъуб.

 
{jcomments}