Быйыл августну 15-си Къарачай-Черкес Кърал миллет библиотекагъа артыкъ да сыйлы кюн болуб ётдю. Ол кюн  бу джарыкълыкъ учреждение эки къууанчны белгиледи. Аланы бири библиотеканы 95-джыллыгъы бла, бири да уллу джазыучу Байрамукъланы Халиматны 100-джыллыгъы бла байламлы эдиле.
Алагъа аталыб баргъан уллу къууанчха республикан властланы келечилери, белгили джамагъат-политика къуллукъчула, алимле, джазыучула, журналистле, артистле, Байрамукъланы тукъумну къартлары келген эдиле.

Къарачай-Черкесиягъа да, республикан библиотекагъа уллу магъаналары болгъан юбилейле бла байламлы айтылгъан эки алгъышлауну алларын КъЧР-ни Правительствосуну Председатели Озов Аслан башлады. «Былайгъа джыйылгъанланы барын да библиотеканы эмда Къарачай-Черкесияны халкъ джазыучусу Байрамукъланы Халиматны белгили юбилейлери бла алгъышлайма. Бизни барыбызны да эсибизде къаллыкъ эки юбилейни да бу сыйлы кюнлерини бизни республикабызны 25-джыллыгъыны джылына тюшгенлеринде ашхы белги барды. Библиотеканы иши хар заманда да къралыбыз бла республикабызны тарихлери бла къысха байламлы болуб келгенди. Аны бла да къалмай, ол Къарачай-Черкес автоном область бла бир джылгъыды. Регионну баш культура-джарыкълыкъ учреждениелерини бири Кърал миллет библиотеканы юбилейи бла алгъышларгъа эмда анга мындан ары да республиканы хайырына ишлеуде джетишимле теджерге излейме», - деди ол.
КъЧР-ни культура министри Бороков Рамазан да, библиотеканы эки юбилей бла да алгъышлай, республиканы культурасын ёсдюрюуде аны уллу магъанасы болгъанын чертди. Библиотеканы ёсдюрюрге кеслерини юлюшлерин къошханланы ведомствону Хурмет грамоталары бла алгъышлады.
Библиотеканы директору Хапчаланы Салых бу джарыкълыкъ учреждениени былай джарашыб ишлеб тургъаны аны къуллукъчуларыны борчларына джууаблы эмда джан аурутуб толтургъанлары  бла эмда республикан властла бла джамагъат организацияланы спонсор болушлукълары бла къысха байламлы  болгъанларыны юслеринден айтды.
- Библиотека бюгюн республиканы баш культура-солуу аралыкъларыны бириди. Арт кёзюуде чыгъарылгъан эсеблеге кёре бизни юсюбюз бла регионнга уллу магъанасы болгъан джамагъат-политика иш бардырылады, 100-ге джууукъ китаб бла пособие чыгъарылады, - деди ол.
Джыйылыуда чертилгенине кёре, 1998-чи джыл октябрны 22-де КъЧР-ни Башчысыны указы бла библиотекагъа «Миллет библиотека» деген дараджа берилгени аны тарих-культура магъанасын кёлтюргенди.
95 джылны ичинде библиотека джыйгъан китаб хазна уллу халкъ рысхыды. Анда бюгюн 380-нга джууукъ китаб, бирси китаб издание барды. Аны себебли ол республиканы китаб хазнасы джыйылгъан баш кърал учреждение, депозитарий болуб турады. Учреждение ол борчун толу да толтурады.
Джыйылыуда Къарачай-Черкес Кърал миллет библиотеканы ёсюу джолуну юсюнден да сейир хапарла айтылдыла.
Алай бла республикан библиотекада эки уллу юбилейни биргелей белгилеу аны андан ары ёсдюрюуню джангы атламыча, бютеу илму-практика ишлени бирикдириб, республиканы культура-джарыкълыкъ дараджасын кёлтюрюуню джангы атламыча ётдю. Аны мында ишни дараджасын ёсдюрюуде, айхай да, белгили магъанасы болмай да къаллыкъ тюлдю.

Хамитланы Хасан.