АЛГЪЫШЛА

Подробности
Бир  къууанчда уста сёлеше  билген огъурлу  къарт, халкъны аллына чыгъыб, алгъыш  айтса, джюрегибиз  учунуб, нюрден  толуб, тёгерегибизде  адамла, туугъан джуртубуз, табигъатыбыз  кёзюбюзге  бютюн да ариу  кёрюнедиле. Ол  себебден  ариу, таза,  джылы  сёзлени  керекли  джерде  бир-бирибизден  къызгъанмай,  айтыргъа  керекбиз. Ариу  алгъышла  айта  билгенле, бизни  газетге  джазыб  джиберселе уа, бек  разы  болуб да басмаларыкъбыз. Биз,  джыллары  бла тамадаракъла, эрикмей, эринмей алгъыш  сёзлени  джаш  тёлюбюзге билгенибизча юретирге  керекбиз. Ма  ол  мурат  бла, ол нюзюр  бла  халкъда  джюрюген  бёлек  алгъышны «Къарачай» газетни  окъуучуларына  теджейбиз.

   ***

Алгъыш сёзню намысы бар, къуту бар.
Къаргъыш сёзню зарлыгъы бар, джуту бар.
Алгъыш таза, джигит эрге джарашыр.
Хатасызгъа  къаргъыш айтхан къабышыр.
Таза  кёлден  чыкъгъан  алгъыш  джетеди,
Къаргъыш терсге зарауатлыкъ этеди.
Разы болмай, алгъыш айтхан гюнахды.
Барысына  тёре  Уллу  Аллахды.
   ***
Джер  юсюне Аллах  берсин  рахатлыкъ,
Къралыбызгъа – мелхумлукъ  бла  мамырлыкъ,
Халкъыбызгъа – келишмеклик, сабырлыкъ,
Юйюбюзге – саулукъ, ийнам, халаллыкъ.
    ***
Тас  болмасын  сыйлы  ана  тилибиз,
Джукъланмасын  таза ислам динибиз,
Дуния  малгъа  сатылмасын бетибиз,
Ёксюзлюкню  сынамасын  джерибиз!
***
Ашауубуз  татлы  болсун, май  болсун, 
Хар  бир  ахлум Рокфеллерден  бай болсун,
Биз ётерик  кёчюу  сыйдам, сай  болсун,
Джашауубуз джюз джыл бла джюз ай  болсун!
   ***
Уллу Аллах чырт кетмесин  эсингден,
Кийик саулукъ чырт кетмесин  юсюнгден,
Кёб болсунла  сенде  насыб, берекет,
Я, Аллахым, тилегими  къабыл  эт!
                           ***
Эки  кёзюнг, джулдузлача, джансынла,
Къолларынгдан  бал тамчыла тамсынла,
Джюрегингде  гокка хансла чакъсынла,
Кёкюрегинге уа  саугъа  такъсынла!
   ***
Этген  ашхы  муратларынг  толсунла,
Сен  сюйгенле  сен сюйгенча  болсунла,
Халал  азыкъ  болсун сени  ашауунг,
Хар  заманда  мамыр  болсун  джашауунг!
   ***
Бир  джангылгъан джанны биз да кечейик,
«Ачыу кёлден»  «басым кёлге» кёчейик.
Сабырлыкъ бла  дертге  кишен салайыкъ…
Бир  Аллахдан  биз  да  юлгю  алайыкъ.
***
Терк-тенгизча  уллу болсун насыбынг,
Ол  насыбха  батсын джалгъан азабынг!
Танг Чолпанча,  джашнаб турсун нюр кёлюнг,
Джолла кибик,  узун болсун ёмюрюнг!
Аллах  сени  кери  этсин  къаргъышдан,
Айтылырча болсун  атынг алгъышда!
***
Алгъышлайма  сени  туугъан кюнюнг  бла!
Джерде  эм баш  джауунг  болсун менлейин!
Насыбдан тол юйюрюнг  бла, юйюнг  бла!
Сен  сюйген  джан сени  сюйсюн  сенлейин!
Саулукълу  бол, рысхылы  бол, тири бол,
Тау намысха хар  заманда  бер сен къол,
Хар  сен  кирген юйге  насыб, сый  кирсин,    
Туугъан  кюнюнг  халкъгъа  насыб  келтирсин!
 
Халкъда  джюрюген  алгъышланы  джыйгъан, джарашдыргъан
      Ёзденланы  Альберт.
 
{jcomments}