Къарачай-Черкес Республиканы Орус драма эмда комедия театры Москвада фестивалда болуб къайтды. Аны бла байламлы газетни къуллукъчусу Аппаланы Билял театрны  башчысы, Россия Федерацияны халкъ артисти Биджиланы Хасаннга тюбеб, ушакъ этгенди.
- Мен билгенден, аллай къараулагъа сан бир коллектив чакъырылады. Сиз ол сыйгъа къалай тыйыншлы болдугъуз?
- Аллындан башласам, аны Театр къуллукъчуланы бирлешиуюню союзу  бла РФ-ны культура  министерствосу къурагъан эдиле. Фестиваль кеси да, джыллары 35-ден атламагъан, джаш режиссёрла салгъан спектакллеге къараргъа джораланнган эди. Дагъыда къошарым: Москва бла Санкт-Петербургда баш окъуу заведениелени режиссёрлукъ факультетлерин бошагъанла, Россияны регионларында билимлерин, фахмуларын, усталыкъларын кёргюзюрге болумлары джетгени бла къалгъанын ачыкъларгъа керек эдиле бу ишни бардыргъанла.

- Ненча театр къошулду фестивалгъа?
- Джюз театр спектакллени видеоматериалларын ийген эдиле. Анда алагъа белгили режиссёрладан, критикледен, актёрладан къуралгъан комиссия къараб, къуру джетини сайлайды. Бизни театр да аланы бири болады. Эндиге дери тёрт кере болгъанды фестиваль, бу бешинчиди. Бу джолгъа дери  Шимал Кавказны къой, Россияны Къыбыла джанындан да бир театр алагъа  къошулмагъанды. Бек джылы тюбедиле. Сора, ол джети театрны арасында, классика пьеса бла келген да биз эдик. Жан-Батист Мольерни «Тартюф» комедиясын элтген эдик. Аны Анна Зуммер салгъан эди, джаш режиссёр. Суратла бла Екатерина Августеняк джарашдыргъан эди. Хореографла да Виктор Семенюк, Олег Кибирев. 
- Къалай ётдю фестиваль?
- Мийик дараджада. Театрны къуллукъчуларыны бирлешиуюню союзуну тамадасы, РФ-ны халкъ артисти А. А. Калягин башланнганындан бошалгъынчы дери юсюнде болду. Бу организацияны театрыны экинчи этажда залында къарай эдиле. Хар спектакль бошалгъандан сора тюбюнде залда, искусствону усталарыны тышында да, къарагъанладан заманы болгъанла джыйылыб, бирден сюзюб турдула. Режиссёрлагъа, актёрлагъа не тюрлю сорууну берирге да эркин эдиле. Кёбчюлюк бир-бири бетине къараб алай ачыкъ сёлешген, хар ким кёлюндегин айтхан хазна болмаучанды. Хыртха ургъанлары да болдула. Бизни спектаклни бек джаратханларына къууандыкъ. Актёрладан айырыб КъЧР-ни махтаулу артистлери Виталий Вартанов бла Ольга Ивашовагъа, Халкёчланы Мариямгъа, Степан Дубицкийге сый бердиле.
   Спектаклни кёргюзюб бошагъан коллективле кетиб бара эдиле. Башхаланы оюнларына да къараргъа излей эдик, деб тиледим да, бир кюнню орнуна юч кюнню турдукъ. Аны ючюн биз артыкъ джоюм этмедик. Джолубузгъа, джашагъан джерибизге, эртденнги ашарыкъгъа фестивалны къурагъанла тёлей эдиле. Кёб затны кёрюб, кёбле бла танышыб, къууаныб къайтдыкъ. Аны барыны да актёрланы усталыкъларын, сынамларын ёсдюрюуде мындан ары магъанасы боллукъду.
- Джетишимли болгъаныгъыз бла алгъышлайма, республиканы атын айтдыргъаныгъыз ючюн да сау болугъуз. Энди не бла къууандырлыкъсыз къараучуланы?
- Юч кере КъЧР-ни Башчысыны грантын бергендиле. Быйыл да анга тыйыншлы болгъанбыз да, испан драматургну Хасинто Грауну «Куклы грей пигмалион» деген пьесасын саллыкъбыз. Москвадан биз иги таныгъан режиссёр Алексей Шумилинни чакъыргъанбыз. Узаймай репетицияла башланныкъдыла.