ЧЫРМАУУКЪ ХАНС (ВЬЮНОК ПОЛЕВОЙ)

Бизни джерлерибизде бу хансны юч тюрлюсю тюбейди: ингичге чапыракълы чырмауукъ ханс, сабан чырмауукъ ханс, хуна чырмауукъ ханс. Бары да кёбджыллыкъладыла, узунлукълары 30-120 сантиметрге джетеди. Уулу хансды. Тамырлары, артыкъсыз да сабан чырмауукъ хансныкъы бир да кючлюдюле, ёзеклидиле, джерге эки метрге дери киредиле.

Тамырыны къабыргъасындан кёб чирчикле, аладан да джетекле ёседиле. Саптагъайы узун ингичгеди, къабыргъалыды, джаланды, эм мийигинде тюкчюклери боладыла. Чапыракълары узун саплыдыла, къыйырлары тюздюле, дуппукъдула. Гоккалары акъсылдым-къызылдым бетлидиле, къонгураучукъгъа ушашдыла.  Чырмауукъ хансла къургъакъ джайлыкълада, чегет къыйырлада, къырлада, джол джанлада, тюз джерледе, саз топуракълы джерледе ёседиле. Дарманнга хансын да, тамырын да джюрютедиле, чырмауукъ хансны чийлей хайырландырыргъа керекди. Кебдирилсе, дарманлыгъы къалмайды. Авиценна (Ибн Сина) чырмауукъ хансны, артыкъсыз да сабан чырмауукъ хансны джюреги, ёпкеси къыяулулагъа, бууулуб ауругъанлагъа, баууру, талагъы, ёт къууугъу инджитгенлеге джоралагъанды.