Батчаланы Азрет-Алийни джашы Дебош, ауругъанланы саулукъларын багъа, халкъына халал къуллукъ эте джашайды. Ол медицина илмуланы кандидаты, баш категориялы врач-хирургду.

Биргесине ишлегенле, анга кеслерин бакъдыргъанла айтхандан, Батча улу керти устады, аты махтау бла айтылыб тургъан белгили хирургду. Адебли-намыслы, халкъны ашхы адетлерин тутуб джашагъан адамды.

Атасы Азрет-Алий ауушханды, джандетли болсун. Ол халкъ махтау бериб, сыйын мийикде тутхан адам болгъанды. Совет Союзну заманында Батчаланы Азрет-Алий Къумуш совхозну директору болуб, эл мюлк санагъатда джерчиликни, малчылыкъны, ёсюмлюкню аякъ юсюне салгъанын айтадыла аны иги таныгъанла. Аны адамлыгъын, элчилеге, башхалагъа да къолундан келгенича джан аурутуб къайгъыргъанын къарт, джаш да бети джарыб эсгереди. Къумушда орналгъан кырпыч заводну директору болгъан кёзюуде джангы технологияланы хайырландырыб, ишге таукел джюрюш бергенин да унутмагъандыла.

Дебош да, атасына ушаб, тутхан ишинде сый табыб ишлейди. Акъыллы,  оюмлу хирург адамланы тынч, рахат джашарларына энчи юлюш къошады. Ол бусагъатда Черкесск шахар клиника больницада хирургду.

Былайда тюрлю-тюрлю аурууланы ачыкълагъан диагностиканы хайырландыра, терк болушлукъ этилирге тыйыншлылагъа къарайды. Хаман да кёз туурада турургъа керекли ауругъанлагъа болуша кёб зат этеди.

 Дебош 1970-чи джыл хычаман (май) айны 12-де Къумушда туугъанды.  Школда иги окъугъанды. Юлгюлю халисин кёргюзюб, тенгчиклерине болуша, устазладан бюсюреу табханлай тургъанды. Ол джамагъат ишлени да толтура, школланы арасында бардырылгъан дерс олимпиадалада талай кере алчы орунлагъа чыкъгъанды.

Батча улу 1988-чи-1990-чы джыллада аскер къуллугъун сый бла толтуруб къайтханды. Билим алыргъа тырмашхан юйдегиден чыкъгъан джаш, окъууун андан ары бардыра, 1990-чы-1997-чи джыллада Волгоградда медицина институтну багъыу факультетин тауусханды. Талай кере усталыгъын ёсдюрген курслада окъугъанды. Медицина учреждениеледе практикалада болгъан сагъатында да ишге таукел кёз бла къарагъанын, тирилигин танытханды.

Дебош, хирургиядан интернатураны ётгенден сора, 1999-чу джылдан бери, Черкесск шахар клиника больницада хирург болуб ишлейди. Ол, илму-тинтиу ишле бардыра, сынамын ёсдюре, 2003-чю-2005-чи джыллада Дондагъы Ростовда кърал медицина институтну аспирантурасын бошагъанды. «Профилактика послеоперационных осложнений при плановых хирургических вмешательствах» деген темагъа диссертациясын джакълаб, медицина илмуланы кандидаты болгъанды.

Кесини диссертация темасыны, усталыгъыны юслеринден илму статьяла, ишле джазгъанды. Регионал, Бютеуэресей илму конференциялагъа къошулуб, докладла этгенди.

Ол, ауруб, аны аллына баргъанны тинтиб, диагноз салыб, операция этеригин, багъыу ишин андан сора бардырады.

Адамны неси ауругъанын, къалайына операция этерге кереклисин билиб къойгъан тынч тюлдю. Ауругъанлагъа джумушакъ тилде сёлеше, операция этерни аллы бла, кёл этиб, аланы джюреклеринден къоркъуулукъну кетериб, таукеллигин кёргюзе, керти уста болгъанын таныта ишлейди.

Операция этилгенден сора заманда да, ауругъан адам дженгил сау болур ючюн мадарла къурай, медицинаны иги билген джаш, кёб тюрлю лагъымны хайырландырады. Солугъан кюнлеринде, байрамлада да бёлюмюне келиб,  операция этилгенлеге къарагъанлай турады. Арыса, къыйналса да, тёзюб, джюрек джылыуун тёгерегиндегилеге бере джашайды.

Аны бютеу хазнасы, фахмусу бла билими, алгъа къарай билгениди.

 Къуллугъун деменгили толтургъан таулу джаш, баш ишини тышында да джаш тёлюню ариу халиге юрете, аланы джюреклерин медицинагъа ача, Шимал Кавказ кърал академияны медицина институтуну хирургия кафедрасында студентлеге лекцияла окъуйду. Кафедраны доцентиди.

Батчаланы Дебош, къуллугъуна кертилигин таныта, инджилгенлеге, сакъатлагъа, бир чурумну юсю бла заран джетиб, аны аллына баргъанлагъа, болушлукъ табдырады. Фахмулу хирургну къолу дженгилди, операцияланы ариу этиб, адамладан сый, махтау табыб джашайды. Анга кёбле, разы болуб, бюсюреу этедиле, тынч, къууанч джашау теджейдиле.

Дебош инджилгенлеге джюреги джарсыйды, къууаннганла бла бирге къууанады, ишин, джумушун талпыб эте, туугъан халкъына, Джуртуна алгъыш айта джашайды.

Адамланы саулукъларын сакълаугъа салгъан къыйынын эсгере, кърал белгили алимни регионал, федерал дараджада кёб Хурмет грамотала, Бюсюреу къагъытла эмда башха затла бла саугъалагъанды.

Лепшокъланы Хусеин.