КИШТИК ДУГЪУМА (КОШАЧЬЯ МЯТА)

Кёбджыллыкъ, мийиклиги бир метрге джетген хансды. Тюб тамырындан ёсген саптагъайы тюз ёрге кёлтюрюледи, кёб бутакълагъа айырылады, юсю да ууакъ тюкчюкле бла джабылады, чапыракълары ючкюлюрекдиле. Кёкке айланнган джанлары джашил, джерге айланнган джанлары кюл-кёк бетлидиле, кеслерин да ууакъ, ингичге тюкчюкле джабыб турадыла. Учлары джитидиле, къыйырлары мычхыча тишлидиле. Гоккалары узун гокка сабланы учларында битедиле, акъсылдымдыла, хар бутакъны, саптагъайыны учунда бир талай гюллери боладыла. Урлугъу сыйдам къонгур бетли, къозгъа ушашды, хар бир гюл 4-шер урлукъ этеди. Киштик дугъума никкол (июнь) айдан башлаб, къыркъауу (сентябрь) айгъа дери чагъады, тик, къабыргъа джерледе, кёкен аралада, бачхалада, бачха тереклени ичлеринде, багушлада ёседи.

Дарманнга хансын хайырландырадыла. Чакъгъан кёзюуюнде саптагъайыны башырагъындан кесиб алыб, салкъын, хауа джюрюген джерде кебдириб джыйыгъыз кир, морт этмейин. Киштик дугъума ашха ачады, хыппырыкъ атдыртады, джюрекге сабырлыкъ береди. Аны ючюн ёпкесинде эмда ёпке башында, тамагъында сууугъу болгъан, ауруб ашаялмагъан, джебегине джетген, башы аурургъа ёч болгъан, хайызы тюрленнген тиширыула да, бир мардада хазырлаб хайырланыгъыз.
Кебдирилиб джыйылгъан кишдик дугъуманы ууакъланнган хансындан уллу шай къашыкъ бла бирни алыб, 300 миллилитр къайнагъан суугъа атыб, шайча этиб, тутуб, 2 сагъатдан сора сюзюб, сюзюлмеден 30 такъыйкъаны ашарны аллы бла, 1-шер уллу шай къашыкъ бла бирни 4 кере ичигиз кюнюне.