Къарачай-Черкес кърал университетде «Школа гражданско-правового воспитания мусульманской молодёжи и лидеров общественного мнения» деген проектни джашаугъа киргизе, арттотур (апрель) айны 15-де Правительствону келечилери, республиканы дин къуллукъчулары, университетни устазлары, студентлери бла тюбешиу болгъанды.

Ол проектни «Всероссийский межнациональный союз молодёжи» деген Бютеуэресей джамагъат къозгъалыу «Международная Исламская Миссия» деген бирлешлик бла дин ислам маданиятха, илмугъа, окъуугъа болушлукъ табдыргъан фондну кючю бла бардырады.

Школну баш мураты Шимал Кавказны джаш тёлюсюн, социал проектле хазырлаугъа, фандрайзингге, проект-менеджментге юретиуню юсю бла, заманны излемине кёре, фахмуларын ачыуду. Бу ишле, джаш адамлагъа джашауда абынмай, алгъа тири атларгъа юренирге мадар берликдиле.

Джыйылгъанланы алларында КъЧКъУ-ну ректору, политика илмуланы кандидаты Ёзденланы Таусолтан, Къарачай-Черкес Республиканы Муслиманларыны дин управлениесини председатели, Шимал Кавказны Муслиманларыны бирикдирген аралыгъыны председатели, муфтий Бердиланы Исмаил хаджи, Къарачай шахарны имамы Орусланы Ахмат хаджи, Къарачай-Черкес Къыбыла православ клисаланы благочинныйи, протоиерей Субтельный Евгений Анатольевич, КъЧР-ни миллет ишлерини, кёбчюлюк коммуникацияла бла басманы хакъындан министрини биринчи орунбасары Хубийланы Ислам, Кавказны Муслиманларыны управлениесини толу эркинликли келечиси, Шимал Кавказны Муслиманларыны бирикдирген аралыгъыны Москвада баш келечиси Пшихачев Шафиг Ауесович, Эресей Федерацияны Президентинде миллетле арасы ишле бардыргъан советини эксперти Хуртаев Кантемир Исхакович сёлешдиле. Ала бары да университетни ректору Ёзденланы Таусолтаннга бюсюреу эте, ол профессионал устала хазырлагъандан сора да, студентлени тюз джолгъа салыу, аланы тин-иннет билимлерин ёсдюрюу джанына да уллу эс бёлгенин айтдыла.Тюбешиуню кёзюуюнде Бердиланы Исмаил хаджи Ёзденланы Таусолтаннга, студентлени маданиятха, халкъны адебине-намысына, ашхы адетлерине юретгени ючюн, «За вклад перед Уммой Карачаево-Черкесской Республики» деген медаль берди. Андан сора да шохлукъну, къарнашлыкъны бегитиб, университетде 11 къралдан окъугъан 40 миллетни келечисин бирикдиргени ючюн разылыгъын билдирди.

Тюбешиуню экинчи джарымында «Самореализация молодёжи в XXI веке: ключевые факторы успеха» деген темагъа Хуртаев Кантемир Исхакович лекция окъуду.

Андан сора тюрлю-тюрлю семинарла болдула, джаш адамла кеслери къурагъан талай социал проектни презентациясын этдиле. Мастер-классла, практика, интерактив сессияла этдиле.

Шимал Кавказ федерал округну республикаларында бардырылгъан семинарланы ахыр эсеблерине кёре, алчыла проектни ахыр ишине, Москвагъа, барлыкъдыла. Ала анда Эресейни белгили экспертлери, джамагъат ишчилери бла тюберге мадар табарыкъдыла. Семинаргъа къошулгъанла къурагъан иги социал проектлени авторлары махтау къагъытла аллыкъдыла. Джаш адамла аланы кючюнден социал проектлени энди боллукъ тюрлю-тюрлю конкурсларына къошулургъа боллукъдула.

 

Лепшокъланы Хусеин.

 
{jcomments}