Быйыл августну 20-да республиканы Драма театрында, адетдеча, Къур’ан окъуучула сыйлы Къур’анны окъуб эришдиле. Аны КъЧР-ни Башчысы Темрезланы Рашидни болушлугъу бла Къарачай-Черкесияны Муслиманларыны дин управлениеси, КъЧР-ни Миллет ишлерини, кёбчюлюк коммуникацияла бла басманы хакъындан министерствосу къурагъан эдиле. Озгъан джылладача, быйыл конкурсха къошулгъанла да, иги деген атха ие болургъа излеб, фахмуларын, билимлерин таныта, къарыуларын, кючлерин аямай кюрешдиле. Аланы арасында 10 джылдан 70 джылгъа деричиле бар эдиле. Профессионалланы окъугъанларына энчи къаралды.


Конкурс «За усердие», «За волю к победе», «За красивый голос», «Самый молодой участник», «Самый пожилой участник», «За звонкий и громкий голос», «За выразительность прочтения» деб талай номинациягъа юлешиннген эди. Бу ашхы ишни КъЧР-ни миллет ишлерини, кёбчюлюк коммуникацияла бла басманы хакъындан министрини биринчи заместители Хубийланы Ислам бла Шимал Кавказ кърал гуманитар технология академияны студенти Катчиланы Рамазан  бардырдыла.
Конкурсха бютеулей да 49 адам къошулгъан эди. Сыйлы Къур’анны окъуб, 4-чю конкурсда хорлагъанла: 10 джылгъа деричилени арасында Байрамукъланы Ислам 1-чи орунну, Тамбийланы Умар 2-чи орунну, Мухаммад Джемакулов бла Ёзденланы Алим 3-чю орунну алдыла.
10 джылдан 20-гъа деричилени арасында Чингиз Джазов 1-чи оруннга, Гапполаны Шамил 2-чи оруннга, Байрамукъланы Расул 3-чю оруннга ие болдула.
20 джылдан 40-гъа деричилени арасында Темаз Газгешев 1-чи орунну, Гапполаны Ислам бла Байрамукъланы Ислам 2-чи орунну, Акъбайланы Мамурай 3-чю орунну алдыла.
40 джылдан 60-гъа деричилени арасында Кипкеланы Ахмат 1-чи оруннга, Къоркъмазланы Альберт 2-чи оруннга, Курачинов Альберт 3-чю оруннга чыкъдыла.
60 джылдан 70-ге деричилени арасында Эрикгенланы Султан 1-чи орунну, Акъбайланы Анзор 2-чи орунну, Ёзденланы Казбек 3-чю орунну алдыла.
70 джылдан уллуланы арасында Акъбайланы Хасан 1-чи оруннга, Мыртаев Шамил 2-чи оруннга, Шаманланы Ханапий 3-чю оруннга ие болдула.
Профессионалланы арасында Чомаланы Альберт 1-чи оруннга, Байчораланы Шамил 2-чи оруннга, Байрамукъланы Ахмат 3-чю оруннга чыкъдыла. Ала бары да ачха саугъала алдыла. Республиканы Башчысы Темрезланы Рашидни баш ёчю, Сауд Аравиягъа хаджилик къылыргъа барыргъа путёвкасы, конкурсда толу чемпион болгъан Чомаланы Альбертге берилди.


Лепшокъланы Хусеин. 
 
 

 
{jcomments}