Апайланы Аскерни джашы Дагир Джёгетей Аягъы районну Джангы Джёгетей элинде 1965-чи джыл туугъанды. 1982-чи джыл элде орта школну тауусханлай, ол «Джёгетей» совхозгъа ишге киреди. Атасы Аскер бла анасы Патия да совхозда уруннганлары себебли, Дагир да, атасына болушлукъ этерге керек болуб, биргесине къойчу болуб джарашады. Анда бир джылны уруннгандан сора, 1983-чю джыл май айда, ол Совет Аскерде къуллукъ этерге заманы джетеди да, борчун берирге кетеди.
Учебкада болгъан алты айыны ичинде аны кёб тюрлю затха юретгендиле. Афганистанда ачы урушла баргъан джыллада, 1984-чю джыл февраль айда, Апай улуну ары иедиле. Башында чертгенимча, ол, талай айны окъуб, кёб затха юреннгени себебли, аны гарнизоннга ашырадыла. Анда ол башындан берилген буйрукъну толтура, джанына къоркъуулу болса да, кёб тюрлю джумушлагъа баргъанлай, аланы толу толтургъанлай тургъанды.
Афганистанны эмда СССР-ни аскер башчыларыны оноулары бла этилген 8 тюрлю уллу операциягъа къошулгъанды сержант Апай улу Дагир. Анда ол связь бёлекни командири болгъанды. Хар бойнуна салыннган борчну айыбсыз толтуруб, командирлеринден бюсюреу табханлай да тургъанды.
Дагирни спорт бла кюрешгени анга уллу болушханды. Саны чыныкъгъан ётгюр джашны тенглери бек сюйгендиле. Андан юлгю алгъанлай тургъандыла.
Дагир аскер бёлеги бла бирге аскер борчун толтурургъа барыб тургъанлай, душманла чабыуул этедиле. Кючлери бегиб, хазырланыб келген моджахед бёлек бла Дагир башчылыкъ этген бёлекни арасында хатерсиз сермешиу баргъанды. Ол сермешиуню кёзюуюнде Апай улу ауур джаралы болады. Алай болса да бетджанны бермейди. Авиация болушлукъ джетгинчи душманла бла къазауат бардырыб турады. Кеси да алайда алгъан джараларындан госпиталда 1984-чю джыл июнну 16-да джан береди.
Алайды да, Апай улу Совет къралны аллында этген антына кертилей къалгъанды. Аны ёлюгюн аскерчи тенглери, сандыкъда туугъан джурту Джёгетейге келтириб, джигитгеча, сый бериб, элни джамагъат къабырларында асырагъандыла.
Апайланы Аскерни джашы Дагир, кичи сержант, интернационал борчун бере, душман бла уруш эте, джигитлик танытханы ючюн Къызыл Джулдузну ордени бла саугъаланнганды. Аны аты Бютеусоюз Эсгериу китабха джазылгъанды. Джигитлени аллеясында афганчылагъа аталыб салыннган мермер сын ташха да джазылгъанды Дагирни аты. Алайы уа къонакъла эмда республиканы школларындан келген сохтала кёб джокълагъан джерди. Сын ташны аллына хар заманда джашил гокка хансла салыннганлай турадыла. РФ-ны Афганчыларыны ветеранларыны союзуну бизни республикада бёлюмю, Джёгетей эл Советни депутатлары эмда элчилери, бир оноугъа келиб, Апайланы Аскерни джашы Дагирге «Джёгетейни хурметли элчиси» деген ат аталгъанды. Аны атын эсгертме къангагъа джазыб, эл школну къабыргъасына да такъгъандыла. Алайды да, афган къазауатны джигити Апайланы Дагирни аты ёмюрлюкге миллетни джюрегинде сакъланныкъды.
 
БАТЧАЛАНЫ Фатима.
 
{jcomments}