Россия Федерацияны Спорт министерствосуну рейтингине кёре, 2016-чы джыл ГТО комплексни толтуруу бла КъЧР Шимал Кавказны субъектлерини арасында баш оруннга чыкъгъанды. Россия Федерацияны регионларыны ичинде да Къарачай-Черкесия 24-чю орундады.

Россия Федерацияны Президенти Владимир Путинни указы бла «Готов к труду и обороне» (ГТО) джангыдан джашаугъа сингдирилгенди. Аны къалай толтурулгъанына къаралгъан заманда талай затха эс бёлюннгенди. Сёзсюз да, уллу эс ГТО комплексни мардасын ненча адам толтургъанына бёлюннгенди. Айтыргъа, КъЧР-де 2016-чы джылны эсеблерине кёре 2057 адамдан 1516 адам ГТО-ну мардасын толтургъанды, ол кёргюзюм 70 процентден аслам болады. Россияда ортача ол кёргюзюм 40 процентди. Аны тышында да аны юсю бла хар 100000 адамгъа бир аралыкъ къуралыргъа тыйыншлыды – Къарачай-Черкесияда джети аралыкъ ачылгъанды.

Аны бла бирге республиканы муниципал къуралышларында ГТО комплекс бла кюреширча аралыкъла къурауну къайгъысы этиледи, аланы материал-техника базаларын игилендириуге эс бёлюнеди.

ГТО-ну Бютеуроссия физкультура-спорт комплексини автомат информацион системасында КъЧР-ден 9729 адам регистрациягъа тюшгенди, ол республиканы джамагъатыны эки процентинден кёбдю.