Къарачайны хазнасы

Подробности
 Къыйма
 
Беш килограмм этге 2,5 килограмм ич джау, 50 грамм туз, 5 сарысмакъ тиш къошулады. Шибижини, тминни адам сюйгенича къошады.
Къыйма тууар этден этиледи. Тууар эт, ич джау да къатышдырыб, тартылады, туз, шибижи, тмин да атылады. Аны иги къатышдырыргъа керекди. Ичегилени джуууб, алагъа тартылыб, хар неси да джарашыб тургъан фарш къуюлады. Аланы джайпакъла этиб эртденблагъа дери тепси юсюнде къояргъа керекди. Андан сора алыб кюннге тагъыладыла. Кебгенден сора тюрлю-тюрлю ушхууурлагъа къошаргъа болады.

Джёрме

  Къойну къарнын уллуракъ кесекле кесиб, аланы тепсиге джайыб, юслерине джаулу ичегиле, ич джау салынады. Аланы буруб, тышларындан къара ичегиле бла чырмаргъа болады. Бусагъатда халы бла чырмаб да къоядыла. Кече бла кюнню сууукъ джерде къоюб, андан сора ингичге агъачгъа суууруб, кюннге тагъыладыла.
Кебген джёрмени бишириб неда къуууруб тёгерек бишген гардош бла ашаргъа болады.

Ич джау

Къойну ич джауун ууакъ туураб, чоюннга къуюб, туз къошуб, иги къайнатыб, тюбюне чёкгенин къатышдырмай, тазасын бир сауутха къуюб сууутургъа керекди. Къайнагъан ич джау къатхандан сора, аны быстыр хызеннге салыб салкъын джерде асырагъандыла.

Къайнагъан джау

Он килограмм джаугъа 40 грамм туз атылады.
Сары джауну чоюннга салыб, туз къошуб, акъыртын джаннган отда 20-30 минут, башындан кёмюгю кетгинчиннге дери, къайнатыргъа керекди. Андан сора отдан алыб, сууутуб, бир сауутха къуяргъа болады.

Тузлукъ

Он литр айраннга 80-90 грамм туз къошулады.
Сют къайнагъандан сора отдан алыб, 36 градусха дери сууутуб, айран этиледи. Аны тюбюнде тешикчиклери болгъан кастролгъа къуюб, бир сауутну юсюне салыргъа керекди. Эки, юч кюнден хуппегиси тюбюне къуюлуб, кастролда къалын тузлукъ къалады. Аны мияла банкагъа къуюб, сууукъ джерге салыб асыраргъа тыйыншлыды.

Тузланнган баш, аякъ

Джыккыргъа тузлукъ къуюб, кесилген малдан артыкъ къалгъан башны, аякъны, тилни, бауурну, ёпкени, сангкъылчакъны, бюреклени ары къуюб, асырагъандыла. Ала анда джазгъа дери иги тургъандыла.
Акъбайланы Халимат.
 
{jcomments}