Къыркъар (август) айны 1-де Черкесскени мэриясында шахарны 200-джыллыгъына аталгъан тарих кёрмюч ачылгъанды.

Анга къараргъа баргъанла 1825-чи джыл къуралгъан Баталпашинск станседен Къарачай-Черкесияны ара шахарына дери Черкесскени тарихинден толу хапарлы боллукъдула.
Алайда тизилген экспонатла бла теджелген материалла шахарны махтаулу, айбат джерлерин, архитектура байлыгъын толу суратлайдыла.
Кёрмючге Баталпашинск стансени мекямларыны суратлары бла эртделеде джашагъан джердешлерибиз юй турмушда хайырландыргъан затла къошулгъандыла. Аланы кёрген адам ол заманлагъа тюшгенча болады. Заман оза, Баталпашинск да, ёсюм ала барыб, магъаналы административ эмда сатыу-
алыу аралыкъ болгъанын кёреди. Кёрмючде Черкесскени орамлары къалай тюрленнгенлерин, биринчи таш мекямла къаллайла болгъанларын кёрюрге да боллукъду.
Къараучула Совет Союзну кёзюуюне аталгъан материалланы бютюн да бек багъалатадыла. 1931-чи джыл, стансеге Черкесск шахар деб аталгъан кёзюуде, ол уллу ёсюм алгъанды.
Кёрмюч бусагъатдагъы Черкесск шахарны да суратлайды. Тарих, маданият байлыкъны да сакълай, республикабызны ара шахары ёсюмню джолу бла барыргъа хазыр болгъанын кёргюзеди. Ашыгъыгъыз Черкесскени тарихинден хапарлы болургъа. Кёрмюч къыркъар (август) айны 10-на дери ишлерикди.


(БИЗНИ КОРР.).

 
{jcomments}