«Кесибизникилени атмайбыз» деген проектни тамалында аскер къаугъагъа къошулгъан экеуленни юйдегилери, Къарачай-Черкесиядан чыгъыб, Карелия бла Санкт-Петербургда айланыб къайтхандыла.
Алайды да, аскер къаугъаны ветераны Черкесскеде джашагъан Салпагъарланы Альбертни юй бийчеси Мадина бла эки сабийи эмда джуртун джаудан сакълай джан берген Александр Середаны эгечи бла къызы джер-суу кёрюб тургъан джерлерине джол тутхандыла.
– Биз къралыбызны бек ариу джерлеринде болдукъ. Кёб сейир зат кёрдюк, заманыбызны магъаналы эмда зауукълу ашырдыкъ. Карелияны табигъатыны ариулугъун, Санкт-Петербургну архитектурасыны сейирлигин унуталлыкъ болмазбыз. Бютюн да сабийлени къууанчлары ичлерине сыйынмай эди, – деб хапар айтханды Салпагъарланы Мадина.
Тургъа баргъанла Сортавала паркда, Рускеала элчикни къатында чучхурлада, Выборг къалада болгъандыла, Санкт-Петербургну тарих джерлеринде айланнгандыла.
– «Кесибизникилени атмайбыз» деген проект адамланы кёллерин кёлтюрюрге джораланнганды. Быллай тургъа атланнганла кёз ачхан бла бирге уллу къралыбызны шахарлары бла шагъырей боладыла, аскер къаугъагъа къошулгъанланы юйдегилери бир-бирлерине илешедиле, – деб чертгенди «Ата джуртну къоруулаучула» фондну республикан бёлюмюню тамадасы Абазалыланы Марат.
Джердешлерибизге джер-суу кёрюрге себеблик этгенлени атларын да айтайыкъ: «Ата джуртну къоруулаучула» фонд, «РЖД Тур», Эресейни Къоруулау министерствосу, КъЧР-ни Правительствосу.




