Эл мюлкде халал урунуб, атын махтау бла айтдыргъанды Кипкеланы Батдалны джашы Алий. Ол тюзлюк джолда таукел алгъа бара, кёбледен бюсюреу табханды. Быйыл анга 86 джыл толады.

Атасы Кипкеланы Ильясны джашы Батдал малда ишлегенди. Кече-кюн демей къой, тууар сюрюулени кютюб, малны джарсытмай къараб, ана къойладан ашхы тёлю алыб, махтаулу ишлегенди. Къатындагъылагъа, болушлукъ кереклиге къайгъыргъаны ючюн, анга разылыкъларын кёбле билдиргендиле.
Анасы Абайханланы Чучайны къызы Байдыматны 13 сабийи болгъанды. Джигит ана, джюрек джылыуун балаларына атаб, аланы керти адамла болуб ёсерлерине къайгъырыб, кече-кюн демей кюрешгенди.
Алий 1940-чы джыл абыстол (ноябрь) айны 15-де Зеленчук районда Красный-Карачай (Схауат) элде Батдалны урунууну багъалатхан огъурлу юйдегисинде туугъанды. 1943-чю джыл абыстол (ноябрь) айны 2-де Къарачайны Орта Азия бла Къазахстаннга кёчюргенлеринде, Кипкеланы Батдалны юйюрю да, талай къарачай юйдеги бла бирге, Къыбыла Къазахстан областны Пахтарал районунда «Текистик» колхозгъа тюшеди. Алайда ачлыкъ, джаланнгачлыкъ къысыб, джашау бек къыйын болгъанды.
Алий анда ауруб, биринчи классха онбир джылында барады. 1954-чю джыл алтотур (март) айда Джамбул областны Меркер районуну «Победа» колхозуна кёчедиле. Алайда 1957-чи джылгъа дери джашаб, кёчюрюлген халкълагъа джуртларына къайтыргъа эркинлик берилгенинде, миллет бла бирге Кавказгъа къайтыб, Хасаут-Греческий элге тюшедиле. Ол мында 5-чи классдан 9-чугъа дери окъуйду, алайдан Къарданикге кёчюб, орта школну анда бошайды.
Кърал аны 1962-чи джыл абыстол (ноябрь) айны 19-да уллу къарнашы Сафар бла бирге аскерге алады. Ала экиси да Уфа шахаргъа тюшедиле. Анда кичи связчыланы, самолётланы электрооборудованиелерине къарагъан механиклени хазырлагъан курслада окъуб, устала болгъанларына къагъытларын аладыла. Эки къарнаш да аскер борчларын тыйыншлы дараджада толтурадыла. Аскер эмда политика хазырлаудан айырмала боладыла. Кърал, аланы эки кере отпускагъа иеди. Джашла, 1965-чи джыл аскер къуллукъларын толтуруб, туугъан джуртларына къайтадыла. Алий «Знамя коммунизма» деген колхозда 5-чи номерли бригадагъа ишге джарашады. Тюрлю-тюрлю къыйын ишлени тыйыншлысыча толтура тургъанлай, 1966-чы джыл аны Черкесскеге къой малланы къол бла ичлендириу джанындан 3 айгъа окъургъа иедиле. Алий аны бошаб, ызына колхозгъа къайтыб, усталыгъыны юсю бла ишлейди. Алайдан Краснодар крайгъа, Лабинск шахаргъа темир бишириучюге (сварщик) окъургъа барады. Белгиленнген курсланы джетишимли тауусуб, анда ишлеб турады. Анга берилген джумушну деменгили толтура, джамагъат ишлеге да къошула, атын иги бла айтдырады. Аны коммунист партияны къурамына аладыла. Кипке улу Лабинский шекер заводда уллу складда джюклеучюлени эмда башха ишчилени бригадирлери болуб, джангы мадарла, амалла киргизе, къыйын ишни дженгиллете, 3 джыл ишлейди. Андан сора, джуртуна къайтыб, Ючкекенде Электрон заводха ишге киреди. Мында аскерчилеге аскер продукцияны джарашдырыб берген бригаданы тамадасы болуб ишлеб турады. Арадан заман озуб, юйюне барыргъа керек болуб, ол алайдан юйюне, туугъан колхозуна келиб, ишге джарашады. Партия организацияны секретары, ревизион комиссияны къурамында да болады. Таулу джаш алайдан Первомайскеге барыб, анда зоотехникле хазырлагъан
бёлюмню айырмагъа бошайды. Ызына къайтыб, усталыкъларыны юсю бла ишлеб турады. Тёгерегиндегилеге болуша, кёбледен бюсюреу табады.
Алийни алайдан Хасаут-Греческий элни администрациясында джерлеге къарагъан, аланы тергеуде тутхан къуллукъгъа саладыла. Ючюнчю дараджалы джер ёлчелеучю, былайда да ишни таб къураб, адамлагъа джерле юлешиб бере, аланы къагъытларын джарашдыра, тамадаладан, башхалдан да бюсюреу табыб ишлейди. Элни джамагъатына къайгъыра, онгсузгъа, къарыусузгъа болушлукъ табдыра, ишге таукел джюрюш бере урунады. Кипке улу алайдан пенсиягъа чыгъады.
Алий Хубийланы Хамзатны къызы Фатима бла джашауун бир этеди. Алагъа юч сабий тууады. Мадина Черкесскеде налог къуллукъда бёлюмню тамадасыны орунбасары болуб, 30 джылдан аслам заманны ишлейди.
Марина Краснодарда джашайды. Хусей Черкесскедеди. Баш билимли фахмулу адамла тюрлю-тюрлю къуллукълада, атларын сый бла айтдырыб ишлейдиле.
Алий, адебли, намыслы адам, игиликге къуллукъ эте, туудукъларына, аладан туугъанлагъа юретир сёзюн айта, тёгерекде ашхылыкъгъа алгъыш эте джашайды.

Лепшокъланы Хусеин.

 
{jcomments}