Сейирлик къурай, джюрек сезимлерин джаш адамла тыйыншлы тёлю болуб ёсерлерине атай, фахмусуну, билимини хурмет кючюн таулу джуртха джая, сохталагъа ашхы билим береди Байрамкъулланы Ожайны къызы Хапаланы Земфира.
Ол 1961-чи джыл башил (январь) айны 3-де Тёбен Тебердиде Ожайны халкъны ашхы адетлерин багъалатхан, кертиликге, тириликге сый берген огъурлу юйдегисинде туугъанды. Мында орта билим берген школну бошагъандан сора, Къарачай-Черкес кърал университетге кириб, аны физика-математика факультетин джетишимли тауусханды. Ол 1983-чю джыл туугъан элинде школгъа ишге кириб, 1992-чи джылгъа дери физикадан устаз болуб ишлеб тургъанды. Андан бери, Джангы Тебердини школуна кёчюб, физикадан устаз, окъуу-юретиу ишледен директорну орунбасары болуб ишлейди. Земфира бусагъатда да Эресейни Джигити Боташланы Къанаматны атын джюрютген Джангы Тебердини орта билим берген школунда къуллугъун сый бла толтурады, атын махтау бла айтдырады. Ол, 43 джылны усталыгъына кертилигин таныта, талай тёлюню тыйыншлы адамла болуб ёсерлерине энчи юлюш къошуб, джашау джолгъа ашыргъанды.
Ашхы устаз сабийлеге билим бергенден сора да, аланы намысны, басымлылыкъны тёрюнде, адебге, намысха, халкъны ашхы адетлерине юретгенлей турады. Нени да терен билген фахмулу адам, сохталагъа джашау джолну тюз кёргюзе, аланы ариу халиге юретеди.
Земфира айтхандан, ол усталыгъын гитчелигинден сюеди. Бу джаны бла кёб затны билирге излеб, кеси кесине соруула соруб тургъанды. Ол учунмакълыкъ аны орта билим берген школгъа элтгенди. Андан бери 40 джылдан аслам озса да, устаз усталыкъны сайлагъанына бир кере да сокъуранмагъанды. Уллу сынамы болгъан фахмулу устаз кесини билимин джангыртханлай, ёсдюргенлей турады. Ол сабийлени да джангы затдан къоркъмазгъа, аны тинтерге, билирге юретеди. Заманны излемине кёре, джангы мадарланы хайырландыра, таукел алгъа барады. Окъуучулагъа тюз, къарачай тилде да дерсни ангылата, алагъа терен билим берирге кюрешеди. Ол, сабийле дерслерине эслерин иер ючюн, аланы бир зат бла сейирсиндирирге кюрешеди.
Аны дерс берген кючю, илму джетишимлери ёсе, мийикден мийикге чыгъарады. Ол, тюрлю-тюрлю дараджада бардырылгъан конкурслагъа, эришиулеге къошулуб, алчы орунланы алгъанлай турады. Земфираны «Совместная деятельность учителя физики и родителей по формированию позновательного интереса учащихся 7-8 классов» деген статьясы «Вестник педагога искусств» деген халкъла арасы журналда басмаланыб, анга махтау келтиргенди. Анда сёз ата-ана, сабийни эсин бу предметге бура, анга хайыр келтирген къаллай иш этерге кереклисини юсюнден барады.
«Современная педагогика: новые подходы и решения» деген номинацияда, «Сотрудничество педагога и родителей для повышения результативности урока физики» деген иши 1-чи орунну алгъанды. Ол аны усталыгъын ёсдюрюр ючюн хаман джангы затла излеб кюрешгенине, сабийле бла арада шохлукъ бегите, атала-анала бла да байламлылыкъ джюрютгенине, керти устаз болгъанына шагъатлыкъ этеди.
Андан сора да Земфира Ожаевна 2026-чы джыл арттотур (апрель) айны 10-да «Педагогическая ярмарка» деген бютеу Эресей дараджалы ишге къошулуб, «Учебные конференции экологического содержания» деген темагъа терен магъанасы болгъан доклад этгенди. Ол, кесини сёзюнде окъуу методикаланы къурауда, сабийлеге хайыр келтирирге боллукъ, аланы экология билимлерин ёсдюрюрге, табигъатха джумушакъ къараргъа, аланы табигъатда орун алгъан джарсыуланы
оноуларын этерге къошаргъа джораланнган, джангы мадарла бла амалланы юслеринден айтханды.
Земфира, Эресейни онглу устазларыны конкурсунда хорлаб, грант алгъанды.
Аны джангы джетишимлери – окъуу, илму ишлери (аланы арасында физика бла байламлы нарт сёзле, «Образование. Дети. Творчество» деген) экология магъанасы болгъан окъуу конференцияла болгъандыла.
Земфира физикадан устазды, школну директоруну окъуу-юретиу ишледен орунбасарыды. Аны баш категориясы барды, ол «Эресей Федерацияны билим бериуюню сыйлы къуллукъчусу» деген атны джюрютеди. Анга Москваны Педагогика академиясыны президиууму, «Академияны хурметли профессору» деген сыйлы ат атаб, профессорну дипломун бергенди. Кеси да Урунууну ветераныды.
Саугъаларыны арасында кёб Хурмет грамотасы, Бюсюреу къагъыты, академияны, педагогика сынамын джаяргъа эркинлик берген сертификаты, «Вестник педагога искусств» деген журналда, «Совместная деятельность учителя физики и родителей по формированию позновательного интереса учащихся 7-8 классов» деген темагъа шагъатлыкъ этген, академия берген сертификаты, «Секрет педагогического успеха» деген бютеу Эресей дараджада конкурсда хорлагъаны ючюн, Москвада Суратлау педагогика академия берген диплому барды. Анга Къарачай-Черкес Республиканы Окъуу бла илму министерствосу да талай Хурмет грамота бергенди. Ала аны, сабийлени юретиуде, билим бериуде усталыгъыны мийиклигин кёргюзедиле.
Земфираны бюсюреуге тыйыншлы атламына ол кесини энчи джер юлюшюн Эресейни Джигити Боташланы Къанаматны аты бла музей ишлетирге бергенин санаргъа боллукъду. Сау болсун!
Земфира Хапаланы Батал бла джашауун бир этгенди. Алагъа къызчыкъ туугъанды. Милана Шимал Кавказ кърал академияны Юрист институтун тауусханды. Ол усталыгъыны юсю бла адамладан бюсюреу табыб ишлейди.
Земфираны джюрек джылыуу, тюз иннети, таза сезими, башхалагъа къайгъырыуу халкъына халал къуллукъ эте, ол аталадан, аналадан, башхаладан бюсюреу таба джашайды.
Лепшокъланы Хусеин.



