Пятигорск шахарны 2-чи номерли школунда «Хоровод дружбы» деген ат бла джарыкъ байрам ётдю. Быллай байрам, адет болуб, бу школда джыл сайын ётеди. Анга сохтала, устазла, ата-анала сюйюб къошуладыла. Быйыл къарачай халкъны адетлерин, маданиятын, ашын-сууун, санагъатларын кёргюзюрге деб чёб атылыб, ол сыйлы джумуш 2-чи классха тюшгенди.

Байрамгъа хазырланыу иги эртде башланады: сабийле класс башчы, ата-аналары бла бирге къарачай халкъны тарихи, адетлери бла танышадыла, тепсеулерине, джырларына юренедиле, назмуларын азбар этедиле, миллетни турмушунда джюрюген, энчилигин кёргюзген затланы, ашарыкъланы хазырлайдыла.
Ашыгъыб сакълагъан кюнлери джетди. Сахнадан къарачай халкъны юсюнден хапар ариу, джарыкъ тилде айтылды. Байрамны сыйлы къонагъы Къарачай-Черкес Республиканы белгили поэти Акъбайланы Харун джыйылгъанланы шохлукъну байрамы бла алгъышлады, Шимал Кавказны халкъларыны арасында ёмюрлени теренинден келген шохлукъну, татлы хоншулукъну мындан ары да сакъларгъа, бир-бирине хурмет бериб, джакълыкъ этиб джашаргъа чакъырды. Ызы бла Асадуллаева Самира, Данил Войтенко, Дана Чернова, Тимофей Данько, бир-бирин ауушдура, Акъбайланы Харунну «Орайда» назмусун окъудула.
Сахнагъа 2-чи классны сохталары миллет кийимле бла чыкъдыла. Орус эмда тау миллетлени кийимлери бла чыкъгъан сабийле Семенланы Исмаилны «Минги
Тауун» бирге джырлагъанларына джыйылгъанла сюйюб, тынгыладыла.
Къарачай миллетни санагъат байлыгъындан къуралгъан кёрмюч да къараучуланы эслерин айырыб кесине бургъанлай турду. Сабийле кийизден, джюнден, халыдан этилген, юй турмушда хайырландырылгъан затланы кёргюздюле, Къарачайны къонакъбайлыкъ адетини юсюнден хапар айтдыла. Тепсиле хычынла, сохтала, джёрмеле, айран дагъыда башха миллет хантла бла джасалгъан эдиле. Аладан алыб, татыуларын кёрюрге да боллукъ эди. Хантланы 2-чи классны сохталарыны ата-аналары, Самираны къарт анасы Асадуллаева Неллини башчылыгъы бла, хазырлагъан эдиле.
– Биз иги, таб этелирбизми хар нени, деб да бек сагъышлы эдик, – дейди класс башчы Апикова Эмма Мухамедовна. – Алай болса да, бизге ата-анала иги болушдула. Бирге хазырлагъан байрамыбыз бек сейирлик иш болуб ётдю.
Шохлукъну байрамы саулай классла бирден къошулгъан тепсеу бла бошалды. Быллай ишле, тюрлю-тюрлю миллетлени маданиятлары бла танышдыргъандан сора да, бир-биринге хурмет берирге, бир-биринги ангыларгъа, шохлукъну бегитирге себеб боладыла. Бу эм багъалы затды. Школ аны сакълагъанлай, бир тёлюден бир тёлюге джетдиргенлей барады.

Тебуланы Салимат.

 
{jcomments}