Аууз-герги (ноябрь) айны 5-де КъЧР-ни Байрамукъланы Халиматны атын джюрютген Кърал миллет библиотекасында, Эресейни халкъларыны бирлигини джылына аталыб, бютеу Эресей акция бардырылды. Ол иш республиканы халкъларыны эртдеден келген маданият байлыкъларын сакъларгъа джораланнган эди.

Келген къонакъла «Бир джазыу бла ёмюрлюкге байламлыбыз» («Одной судьбой мы связаны навеки») деген китаб-сурат кёрмючге къарадыла. Ингирни «Мой край в пейзаже и портрете» деген бёлеги КъЧР-ни махтаулу суратчысы Зоя Киблахованы чыгъармачылыкъ джолуна аталгъан эди. Аны ишлерини юсюнден хапар айтхан заманда КъЧР-ни махтаулу журналисти Светлана Шендрикни «Мастерство и вдохновение» деген документли киносун кёргюзгенлей турдула. Ызы бла джыйылгъанла композитор, Эресейни махтаулу артисти эмда КъЧР-ни халкъ артистин Хатууланы Халитни джылы сёзле бла эслерине тюшюрдюле.
«Бир джазыу бла ёмюрлюкге байламлыбыз» деген китаб-сурат кёрмюч Къарачай-Черкесияны халкъларыны санатларыны «ич дунияларын» кёрюрге себеб берди.
«Санатланы ингири» деген бютеу Эресей акция джыл сайын музейлени, библиотекаланы, театрланы, башха маданият учреждениелени бир-бирлери бла байламлы этгенлей турады. Ол иш Эресейни халкъларыны санатлары бла эмда маданият байлыкълары бла танышдырыргъа джораланады.

Къапланланы С.

 
{jcomments}